කොළඹ, 2025 අගෝස්තු 24: පසුගිය සිකුරාදා (අගෝස්තු 22) හිටපු ජනාධිපති රනිල් වික්‍රමසිංහගේ අත්අඩංගුවට ගැනීම ශ්‍රී ලංකාවේ දේශපාලන ක්ෂේත්‍රය තුළ දැඩි ආන්දෝලනයකට තුඩු දී තිබේ. මහජන මුදල් අවභාවිත කිරීමේ චෝදනා යටතේ කොළඹ දී අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් හිටපු ජනපතිවරයා දැනට රෝහල්ගතව සිටින්නේ රිමාන්ඩ් භාරයේය. වසර ගණනාවක් තිස්සේ ශ්‍රී ලංකා දේශපාලනයේ ප්‍රධාන චරිතයක් වූ ඔහුගේ මෙම අත්අඩංගුවට ගැනීම, රටේ දේශපාලන ක්ෂේත්‍රය උණුසුම් කර ඇත.
මෙම අත්අඩංගුවට ගැනීම මෑත කාලයේ ඉහළම දේශපාලන ප්‍රභූවරයෙක් අත්අඩංගුවට පත් පළමු අවස්ථාව වන අතර කිසිදු අයෙක් මෙම අත්අඩංගුවට ගැනීම සිදුවෙතැයි ගණන් බලා තිබුණේ නැත.
චෝදනාවට තුඩු දුන් සිදුවීම
අධිකරණයට ඉදිරිපත් කර ඇති චෝදනා අනුව, හිටපු ජනපතිවරයා 2023 දී එක්සත් රාජධානියේ කළ නිල සංචාරයක් අතරතුර මහජන මුදල් අවභාවිත කර ඇතැයි කියැවේ. මෙම චෝදනාවට මූලික වී ඇත්තේ, ඔහුගේ බිරිඳගේ ගෞරව මහාචාර්ය පදවියක් සම්බන්ධ පෞද්ගලික උත්සවයකට සහභාගි වීම සඳහා රාජ්‍ය අරමුදල් භාවිතා කිරීමයි. බලධාරීන් කියා සිටින්නේ, මේ සඳහා රුපියල් මිලියන 16.6ක් පමණ වූ මුදලක් නීති විරෝධී ලෙස යොදවා ඇති බවයි. ඔහුට එරෙහිව ඇති මෙම චෝදනා යටතේ වරදකරු වුවහොත්, වසර 20ක් දක්වා සිරදඬුවමක් සහ විශාල දඩ මුදලක් නියම විය හැකි බව වාර්තා වේ.
කෙසේ වෙතත්, හිටපු ජනපති වික්‍රමසිංහගේ නීතිඥයන් චෝදනාව තරයේ ප්‍රතික්ෂේප කර ඇති අතර, එම සංචාරය නිල රාජකාරියක කොටසක් බව පෙන්වා දෙයි. ඔවුන් පවසන්නේ, මෙය දේශපාලන පලිගැනීමක් බවයි.
අත්අඩංගුවට ගැනීම සහ සෞඛ්‍ය තත්ත්වය
පසුගිය සිකුරාදා අත්අඩංගුවට ගැනීමෙන් පසු, ඔහු අධිකරණයට ඉදිරිපත් කෙරුණු අතර, අගෝස්තු 26 දක්වා රිමාන්ඩ් භාරයට පත් කරන ලදී. සෙනසුරාදා සහ ඉරිදා දිනවලදී, ඔහු බන්ධනාගාර රෝහලේදී ඇති වූ විජලනය, දියවැඩියාව සහ අධිරුධිර පීඩනය වැනි සෞඛ්‍ය සංකූලතා හේතුවෙන් ජාතික රෝහලට ඇතුළත් කෙරිණු අතර මේ වන විට ඔහු දැඩි සත්කාර ඒකකයේ සමීප අධීක්ෂණය යටතේ සිටී. ඔහුගේ තත්ත්වය ස්ථාවර බව වෛද්‍යවරුන් පවසා ඇත. රෝහල් ගත කර සිටියද, ඔහු අධිකරණ භාරයේ පවතින බව බලධාරීහු තහවුරු කරති. කෙසේ වෙතත්, ඊයේ (24) ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලන පැවසුවේ රනිල් වික්‍රමසිංහ හිටපු ජනපතිගේ තත්වය අනුව 26 දා අධිකරණයට ඉදිරිපත් කිරීමට හැකි වේ දැයි සැකසහිත බවයි.
දේශපාලන පසුබිම සහ ප්‍රතිචාර
මෙම සිදුවීම සිදුවන්නේ, 2024 සැප්තැම්බර් ජනාධිපතිවරණයෙන් අනුර කුමාර දිසානායක මහතාට පරාජය වීමෙන් පසුවය. දූෂණයට එරෙහිව දැඩි ස්ථාවරයක සිටි නව ජනාධිපතිවරයාගේ ප්‍රතිපත්තියට අනුකූලව මෙම අත්අඩංගුවට ගැනීම සිදු වූවක් බවට දේශපාලන විචාරකයෝ අදහස් දක්වති.
මෙම අත්අඩංගුවට ගැනීම දේශීයව මෙන්ම ජාත්‍යන්තරවද අවධානයට ලක්ව තිබේ. ඉන්දීය පාර්ලිමේන්තු මන්ත්‍රී ශෂී තරූර් මහතා චෝදනා විස්තර කර ඇත්තේ “සුළු” ලෙස වන අතර, ශ්‍රී ලංකාව “පලිගැනීමේ දේශපාලනයකට” ඇදී නොයා යුතු බවට අනතුරු අඟවා ඇත.
ඒ අතර ශ්‍රී ලංකාවේ වෙනස් දේශපාලන කඳවුරුවල නියෝජනයන් සහිතව විශාල පිරිසක් එක්වී මාධ්‍ය සාකච්ඡාවක් පවත්වමින් කියා සිටියේ මෙය ව්‍යවස්ථාපිත නීතිය යොදාගනිමින් කරන දේශපාලන පලිගැනීමක් බවයි. හිටපු ජනපති මෛත්‍රීපාල සිරිසේනද මීට එක්ව අදහස් පළ කළ අතර, ඔහුගේ අදහස්වල පැවති වැරදි කරුණු හේතුවෙන් මේ වන විට සමාජ මාධ්‍යවලද කතාබහක් ඇති වී තිබේ. රනිල් වික්‍රමසිංහගේ දේශපාලන සතුරන් බොහෝ දෙනෙක්ද මීට එක්ව තිබීම කතාබහට ලක්ව ඇත.
හිටපු ජනපතිවරයාගේ අත්අඩංගුවට ගැනීම නව රජයේ දූෂණ විරෝධී ප්‍රයත්නයන්හි සන්ධිස්ථානයක් ලෙස සැලකෙන අතර, ඉදිරියේදී නීතිමය ක්‍රියාමාර්ග සහ දේශපාලන ක්ෂේත්‍රය තුළ ඇතිවිය හැකි තත්ත්වය පිළිබඳව අවධානය යොමු වී ඇත.
නඩුකරය නැවත කැඳවෙන 26 වැනි දා හිටපු ජනපති වික්‍රමසිංහ වෙත ඇප ලබාදීම හෝ රිමාන්ඩ් භාරය දීර්ඝ කිරීම පිළිබඳව අධිකරණය තීරණයක් ගනු ඇත. විපක්ෂය සහ ජාත්‍යන්තර ප්‍රජාව මෙම සිද්ධියට දක්වන ප්‍රතිචාර, රටේ අනාගත දේශපාලන ස්ථාවරත්වයට බලපානු ඇත.
මෙවැනි ප්‍රබල දේශපාලන ප්‍රභූවරයෙක් අත්අඩංගුවට ගැනීම සිය ප්‍රභූ දේශපාලන ගමන්මග සහ තමන්ට එරෙහිව තිබෙන චෝදනා සම්බන්ධයෙන් බලපාන අයුරු සලකා මෙරට දේශපාලනයේ ප්‍රභූ තන්ත්‍රය සසල වී කටයුතු කරන සෙයක්ද පෙනෙන්නට තිබේ. මෙය සැලකිය හැක්කේ වතුරේ ගසාගෙන යද්දී විවිධ සතුන් එක් කොටයකට ගොඩවී දිවි ගලවගැනීමට කරනා වෑයමකටයි.
කෙසේ වෙතත්, නව දේශපාලන විපරිවර්තනයත් සමඟ සිදුවන මෙම සිදුවීම් දේශපාලන පුරෝකථන බොහෝ දුරට අසරණ කර තිබේ.
