ශ්රීලන්කන් ගුවන් සේවයේ උපායමාර්ගික සමාලෝචනය සහ ප්රතිව්යුහගත කිරීම සඳහා ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජේසූරියගේ සභාපතිත්වයෙන් යුත් කමිටුවක් පත් කිරීමට අමාත්ය මණ්ඩල අනුමැතිය හිමිව තිබේ.
එහි සෙසු සාමාජිකයන් ලෙස,
I. ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව
II. මුල්ය සහ ආයතනික උපායමාර්ග විශේෂඥ දේෂාල් ද මෙල්
III. ගනුදෙනු සහ ආයෝජන බැංකුකරණය, ඒකාබද්ධ කිරීම් සහ අත්පත් කරගැනීම් විශේෂඥ දුමිත් ප්රනාන්දු සහ
IV. මුදල් අමාත්යාංශයේ ලේකම් හෝ ඔහුගේ නියෝජිතයෙකු,
V. ප්රවාහන, මහාමාර්ග සහ නාගරික සංවර්ධන අමාත්යාංශයේ ලේකම්/ සිවිල් ගුවන් සේවා අධිකාරියේ නියෝජිතයෙකු හෝ නියෝජිත
VI. ශ්රී ලන්කන් ගුවන් සමාගමේ සභාපතිවරයා
VII. ආයතනික, ගුවන් සේවා, මහජන නීතිය යන විෂයයන් පිළිබඳ විශේෂඥතාවක් ඇති නීති විශේෂඥයන්,
VIII. ගුවන් සේවා කර්මාන්ත විශේෂඥයන් පත් කෙරෙනු ඇත.
ශ්රී ලන්කන් ගුවන් සේවය පිළිබඳව පුළුල් සාර්ව ආර්ථික පරිසරයේ දෘෂ්ටිකෝණයන් සැලකිල්ලට ගනිමින්, පුළුල් උපායමාර්ගික සමාලෝචනයක් සිදු කිරීම හදිසි ප්රමුඛතාවක් ලෙස රජය හඳුනාගෙන ඇති අතර මෙම සමාලෝචනයේ ප්රධාන අරමුණ වන්නේ රජය මත දිගුකාලීනව පැටවෙන මූල්ය බර අවම කරමින් මුල්යමය වශයෙන් තිරසාර සහ වාණිජමය වශයෙන් කාර්යක්ෂම ජාතික ගුවන් සේවාවක් ස්ථාපිත කිරීමය.
ඒ අනුව, ගනුදෙනු උපදේශක ලෙස කටයුතු කරන ජාත්යන්තර මූල්ය සංස්ථාව (International Finance Corporation – IFC) ආයතනය සමග සහයෝගයෙන් කටයුතු කිරීම සඳහා ශ්රී ලන්කන් ගුවන් සේවයේ උපායමාර්ගික සමාලෝචනය සහ ප්රතිව්යුහගත කිරීම සඳහා වූ කමිටුවක් පිහිටුවීම වඩාත් සුදුසු බව හඳුනාගෙන තිබේ.
I. උපායමාර්ගික දෘෂ්ටිකෝණය සහ අනාගත ක්රියාමාර්ග පිළිබඳ ස්වාධීන සමාලෝචනයක් සහ ඇගයීමක් කිරීමත්,
II. ප්රතිව්යුහගත කිරීමේ අවශ්යතා සහ විකල්ප ප්රතිව්යුහගත කිරීමේ ආකෘති පිළිබඳ නිර්දේශ ලබා දීමත්,
III. නිශ්චිත උපායමාර්ගික විකල්ප ඇගයීමක් සහ රජයේ සමස්ත අරමුණු සමග සමානව ගැළපෙන වඩාත් සුදුසු ක්රියාමාර්ග පිළිබඳ නිර්දේශ කිරීමත්,
IV. ශ්රී ලංකා රජය විසින් තීරණය කරනු ලබන තෝරාගත් උපායමාර්ගය සහ ක්රියාත්මක කිරීමේ ක්රමවේදය සඳහා අධීක්ෂණය, මාර්ගෝපදේශනය සහ සහාය ලබා දීමත් මෙම කමිටුවට පැවරී ඇත.
මෙම කමිටුව උපායමාර්ගික සමාලෝචනය සහ ප්රතිව්යුහගත කිරීමේ ක්රියාවලිය පවතින කාලසීමාව තුළ හෝ ශ්රී ලංකා රජය විසින් නිල වශයෙන් විසුරුවා හරිනු ලබන තෙක් ක්රියාත්මක වනු ඇත.
