තමා ඇතුළු විපක්ෂයේ මන්ත්‍රීවරුන් කිහිපදෙනකු වන මනෝ ගනේෂන්, දයාසිරි ජයසේකර, මුජිබර් රහුමාන් සහ චානක මාදුගොඩ යන මන්ත්‍රීවරුන් විසින් වරප්‍රසාද ප්‍රශ්නයක් ඉදිරිපත් කළ බවත් එයට හේතුව වූයේ කථානායකවරයාට එරෙහිව විපක්ෂය ගෙන ආ විශ්වාසභංගය විවාදයට නොගෙන ප්‍රතික්ෂේප කිරීම බවත් විපක්ෂ නායක සජිත් ප්‍රේමදාම මහතා අද (06) පාර්ලිමේන්තුවේදී පැවසීය.
පාර්ලිමේන්තු මන්ත්‍රීවරුන් සියලු දෙනා ආණ්ඩුක්‍රම ව්‍යවස්ථාව අනුව දිවුරා එය අනුගමනය කරන බවට පොරොන්දු වන බවත් මේ උත්තරීතර නීතියේ ත්‍රීපාර්ශ්වීය රාජ්‍ය පාලනයක් ක්‍රියාත්මක වන අතර සංවරණ හා තුලන ඇති බවත් ව්‍යවස්ථාදායකයේ ඇති සංවරණ හා තුලනයක් වන්නේ විශ්වාසභංග යෝජනා ඉදිරිපත් කිරීම බවත් මේ යෝජනාව විපක්ෂයට ඉදිරිපත් කිරීමේ අයිතිය සේම එහි අන්තර්ගතය තීරණය කරන්නේද විපක්ෂය බවත් අන්තර්ගත කරුණුවලට ආණ්ඩු පක්ෂයට බාධා කරන්න නොහැකි බවත් විපක්ෂ නායකවරයා වැඩිදුරටත් පැවසීය.
එසේම ස්ථාවර නියෝග 29 (1), (2) අනුව වරප්‍රසාද කඩ වී ඇති බවත් මෙය න්‍යාය පුස්තකලයට ඇතුළත් වූ පසු පක්ෂ නායක රැස්වීමේ දී ඒ කරුණු කාරණා වෙනස් කරන්න යැයි කියන අතර වෙනස් කළොත් අවස්ථාව දෙන්නම් යැයි පැවසීම ආණ්ඩුක්‍රම ව්‍යවස්ථාවට පටහැනි බවත් ප්‍රේමදස මහතා කියා සිටියේය.
මෙය විධායකය විසින් ව්‍යවස්ථාදායකය යටපත් කිරීමක් වන හෙයින් මෙය නැවත සොයා බැලිය යුතු බව විපක්ෂ නායකවරයා තවදුරටත් පැවසීය.
