පසුගිය 2022 වසරේ මැයි 09 වැනි දින අරගල සමයේ දී හිටපු අමාත්‍ය ජොන්ස්ටන් ප්‍රනාන්දුට අයත් දේපළ විනාශ කළ බවට එල්ල වූ චෝදනා සඳහා වරද පිළිගත් කොළඹ මහ නගර සභාවේ හිටපු නාගරික මන්ත්‍රීවරයෙකු වන මොහොමත් ඉස්මායිල් මොහොමඩ් අනස් ඇතුළු විත්තිකරුවන් දස දෙනෙකුට බරපතළ වැඩ සහිත වසර දෙක බැගින් වූ අත්හිට වූ සිර දඬුවම් කොළඹ මහාධිකරණ විනිසුරු ලංකා ජයරත්න මෙනවිය අද (09) නියම කළාය.
අරගල සමයේ දී යුනියෙන් පෙදෙසේ පිහිටි හිටපු අමාත්‍යවරයාට අයත් hotel colombo නමැති සංචාරක හෝටලයට පොළු මුගුරු රැගෙන කඩා වැදී අලාභ හානි සිදු කිරීම හා එම හෝටල් පරිශ්‍රයේ නවතා තිබූ ජීප් රථ දෙකකට පහර දී රුපියල් ලක්ෂ තිස්පහකට අධික අලාභයක් සිදු කිරීම ඇතුළු චෝදනා එම සැකකරුවන්ට එරෙහිව ගොනු වී තිබුණි.
ඒ අනුව, එම හෝටලයේ තිබූ පරිගණකයක් පැහැරගෙන යාමේ චෝදනාවට වරදකරු වූ පළමුවන විත්තිකාර මොහොමඩ් මුස්නි මුභාරක් යන අයට රුපියල් 80000ක දඩයක් ද ඉතිරි විත්තිකරුවන් 09 දෙනාට රුපියල් 65000 බැගින් වූ දඩයක් ද විනිසුරුවරිය විසින් නියම කරනු ලැබීය.
විත්තිකරුවන් විසින් අධිකරණයේ කාලය වැය නොකර මුල් අවස්ථාවේදීම සිය වරද පිළිගනු ලැබීම හේතුවෙන් මෙලෙස ලිහිල් සිරදඬුවම් නියම කරන බවයි විනිසුරුවරිය සිය තීන්දුව ප්‍රකාශයට පත් කරමින් සඳහන් කර ඇත්තේ.
දේපළ විනාශය මගින් සිදු වූ අලාභ හානි වෙනුවෙන් රුපියල් ලක්ෂය බැගින් වූ වන්දි මුදලක් ගෙවීමට කැමති බව අධිකරණයේ හමුවේ ප්‍රකාශ කිරීමෙන් අනතුරුව මෙලෙස මහේස්ත්‍රාත්වරිය විසින් දඬුවම් නියම කරනු ලැබීය.
