භූ විද්‍යා සමීක්ෂණ හා පතල් කාර්යාංශයේ (GSMB) අධ්‍යක්ෂ ජනරාල් (වැඩබලන) ලෙස පත් කර ඇති ඩී.පී.ආර්. වීරකෝන් යන අය එම ආයතනයේ ම භූ විද්‍යාඥවරියක් ලෙස කටයුතු කරද්දී බරපතළ විෂමාචාර චෝදනාවකට වරදකරු වූ අයෙකු බව වාර්තා වේ.
ඇයට මෙම විෂමාචාර චෝදනාව එල්ල වූයේ රත්රන් කුඩු සහිත පස් අපනයන කිරීම සම්බන්ධ භූ විද්‍යා සමීක්ෂණ හා පතල් කාර්යාංශයේ විමර්ශන වාර්තාවක්, ආයතනයේ ක්‍රමවේදයට පටහැණිව, විධිමත් අනුමැතියකින් තොරව බාහිර පාර්ශ්වයකට ලබා දීම සම්බන්ධයෙනි. මෙම සිදුවීමට අදාළව 2018 වර්ෂයේදී ඇයගේ රාජකාරි වැඩ වැටුප් රහිතව තහනම් කිරීමට සභාපතිවරයා ක්‍රියාකර තිබුණි. එසේ ම අවසරයකින් තොරව රාජකාරි පරිශ්‍රයට ඇතුළුවීමටද ඇයට එමගින් තහනම් කරන ලදී.
එයට අදාළ ලිපිය පහතින් දැක්වේ,
විනය පරීක්ෂණයේදී සියලු චෝදනාවන්ට වැරදිකාරිය කරනු ලැබූ මෙම නිලධාරිනිය සේවයෙන් පහ කරන ලදී. කෙසේ වෙතත්, සානුකම්පිත හේතු මත ඇයව සේවයට බඳවාගෙන ඇති අතර එහිදීද ඇය ඉදිරිපත් කළ හේතු ව්‍යාජ ඒවා බවයි තතුදත් ආරංචිමාර්ග පවසන්නේ.
කෙසේ වෙතත් මාලිමා රජය බලයට පත් වූ පසුව 2025 මාර්තු 6 වන දින සිට ක්‍රියාත්මක වන පරිදි GSMB හි ( වැඩබලන) අධ්‍යක්ෂ ජනරාල් ලෙස පත් කරන ලද්දේ ඇයවයි.
දූෂණයෙන්, ගසා කෑමෙන් බැට කා බැරිම තැන ජනතාව ජාතික ජනබලවේග රජය පත් කර ගත්තේ දූෂිතයන්ගෙන් වෙනස් ආණ්ඩුකරණයක සිහිනයෙනි. වර්තමානයේ දූෂිතයින්, වංචනිකයන්ට එරෙහිව නිවැරදි නීති ක්‍රියාමාර්ග ගැනෙද්දී මෙවැනි අය නැවත හිටියාටත් වඩා උසස් තනතුරුවලට පත් කරන්නේ ඇයිදැයි කියාත් බලධාරීන් පිළිතුරු දිය යුතු ය.
භූ විද්‍යා සමීක්ෂණ හා පතල් කාර්යාංශයේ හිටපු නියෝජ්‍ය අධ්‍යක්ෂවරයෙක් වන ඇන්ටන් ජයකොඩි වර්තමානයේ නියෝජ්‍ය පරිසර ඇමැති ලෙස කටයුතු කරයි. ඔහු සහ මෙම වැඩබලන අධ්‍යක්ෂ ජනරාල්වරිය එකට ආයතනයේ කටයුතු කර ඇති හිතවතුන් බව පැවසෙන අතර, මෙම පත් කිරීමට නියෝජ්‍ය ඇමැතිවරයාගේ සම්බන්ධයක් තිබේ දැ යි අපි නොදනිමු. එහෙත් මෙවැනි පත්කිරීම් සම්බන්ධයෙන් එවැනි සැකසංකා ඇති කර ගැනීම වැරදි යැ යි කිව නොහැකි ය. අප පසු කළේ එවැනි ඥාති හිතමිතුරු සංග්‍රහයන්ගෙන් වැසුණු යුගයකි.
කෙසේ වෙතත්, මෙවැනි හෙයියම්මාරුවලින් පසුව වැඩබලන අධ්‍යක්ෂ ජනරාල් ලෙස පත් වූ දීපානි වීරකෝන් කටයුතු කරන්නේ ද රටට අතිශය වැදගත් කර්මාන්තයක් මෙම ක්ෂේත්‍රය වළපල්ලට යන අයුරිනි.
වැඩබලන අධ්‍යක්ෂවරිය විසින් නිකුත් කර ඇති අභ්‍යන්තර චක්‍රලේඛයක් අනුව පාර්ලිමේන්තු පණතක් මගින් තහවුරු කරන ලද ඛනිජයක් වන ක්වාර්ට්ස් සම්බන්ධයෙන් බලපත්‍ර නිකුත් කිරීමේ බලය කාර්යාංශයෙන් පරිබාහිර ආයතනයකට පවරා තිබේ. එය කාර්යාංශයේ බලතල හා ආදායමටද බලපෑම් කරන්නක් සේ ම නීතිවිරෝධී කාර්යයන් සඳහා අනුබල දෙන්නකි. එසේ ම එය පැහැදිලිව පණත උල්ලංඝනය කිරීම විසින් රටේ බලපවත්නා නීතිය ද කඩ කිරීමකි. මෙලෙස කටයුතු කළ හැකි වන්නේ උත්තරීතර පාර්ලිමේන්තුවේ සම්මත කරන ලද පණතක් හරහා බැවින් මෙය පාර්ලිමේන්තුවේ බලයද ඉක්මවා යෑමකි.
එසේ ම අධිකරණ තීන්දුවකින් භූ විද්‍යා හා පතල් සමීක්ෂණ කාර්යාංශයේ අධ්‍යක්ෂවරයෙකු වෙත සේවය සඳහා පහසුකම් ලබා දෙන ලෙස නියෝග කර තිබියදීත් ඇයට නිල කාමරයට ඇතුළු වීම තහනම් කර උන්හිටි තැන් නැති කර තිබේ. මෙයද අධිකරණයට අපහාස කිරීමක් බව අමුතුවෙන් කිව යුතු නොවේ. මෙම කටයුත්ත පලිගැනීමක් අරමුණු කරගෙන සිදු කරන බව වාර්තා වන අතර අදාළ ලිපිය පහත දැක්වේ.
මේ සියලු කරුණු විසින් පෙනී යන්නේ, දූෂිත බව ඔප්පු වූ නිලධාරිනියක් වඩා උසස් තනතුරකට පත් කිරීමට මාලිමා රජය කටයුතු කර ඇති අතර ඇයගේ කටයුතු හේතුවෙන් රටට විදේශ විනිමය ගෙනෙන වැදගත් ආයතනයක් වළපල්ලට යමින් ඇති බවයි. ජනතාව ජාතික ජනබලවේග රජය පත් කර ගත් අරමුණු මේ අනුව සේදී යන බව අමුතුවෙන් කිව යුතු නොවේ. මෙවැනි අය සම්බන්ධයෙන් ක්‍රියාමාර්ග නොගන්නේ නව රජය යටතේ ද මිත්‍ර සංග්‍රහය ක්‍රියාත්මක වන නිසා දැයි අප රජයේ ප්‍රධානීන්ගෙන් ප්‍රශ්න කරමු.
- විශේෂ ලියුම්කරුවෙකු විසිනි
