ඉන්දුනීසියානු බාලි දූපත අසල දී මගී නෞකාවක් ගිලී යාමෙන් මේ වන විට සිව්දෙනෙකු මියගොස් 38 දෙනෙකු අතුරුදහන් වී ඇතැයි විදෙස් මාධ්‍ය වාර්තා කරයි.
පුද්ගලයින් 65 දෙනෙකු රැගත් මෙම නෞකාවේ සිටි 23 දෙනෙකු අනතුරින් දිවි ගලවා ගෙන ඇති බව වාර්තා වේ.
නැගෙනහිර ජාවා හි බන්යුවන්ගි වරායෙන් ඊයේ (02) බාලි බලා මෙම මගී නෞකාව පිටත්ව ගොස් ඇති අතර ගමන ආරම්භ කර පැය භාගයකට පමණ පසු නෞකාව පෙරළි ගිලී ගොස් ඇති බවයි විදෙස් මාධ්‍ය පෙන්වා දෙන්නේ.
අනතුර සිදුවන අවස්ථාවේ මෙම මගී ප්‍රවාහන නෞකාවේ මගීන් 53 දෙනෙකු සහ කාර්ය මණ්ඩල සාමාජිකයින් 12 දෙනෙකු සිට ඇත.
තව ද එම නෞකාවේ ට්‍රක් රථ 14ක් ඇතුළු වාහන 22 ක් ද තිබී ඇති බව වාර්තා වේ.
මේ වන විට අතුරුදහන් වූවන් සොයා මෙහෙයුම් ක්‍රියාත්මක කර ඇති බව විදෙස් මාධ්‍ය වැඩිදුරටත් සඳහන් කරයි.
