උපකාරක පන්ති ගුරුවරියක් වන හර්යේෂිකා ප්‍රනාන්දු හෙවත් “ටීචර් අම්මාට” අපහාසාත්මක වන අසත්‍ය කරුණු අන්තර්ජාලය ඔස්සේ පළ කිරීම වළක්වමින් කොන්දේසි සහිත වාරණ ආඥා තුනක් නිකුත් කර තිබේ.
කොළඹ ප්‍රධාන මහේස්ත්‍රාත් තනුජා ලක්මාලි ජයතුංග මහත්මිය විසින් අන්තර්ජාල ක්‍රියාකාරීන් තිදෙනෙකුට එරෙහිව ඊයේ (14) මෙම නියෝගය නිකුත් කර තිබුණි.
හයේෂිකා ප්‍රනාන්දු මහත්මිය විසින් 2024 අංක 9 දරණ මාර්ගගත ක්‍රමවල සුරක්ෂිතභාවය පිළිබඳ පනතේ 24 වගන්තිය ප්‍රකාරව පැවරූ පැමිණිලි තුනක් සලකා බැලීමෙන් අනතුරුව මෙම වාරණ නියෝග නිකුත් කර ඇත.
චමින්ද රණවීර හෙවත් සම්පත්, සුදත්ත තිලකසිරි හා රාජාංගණයේ සද්ධාරත්න හිමි වග උත්තරකරුවන් කරමින් පැවරූ පැමිණිලි තුනක් සලකා බැලීමෙන් පසුව මෙම වාරණ නියෝග නිකුත් කර ඇති බව සඳහන්.
පැමිණිල්ල වෙනුවෙන් නීතීඥ ධනුෂ්ක රාහු බැද්ද මහතා අධිකරණයට කරුණු දක්වමින් කියා සිටියේ පැමිණිලිකාරිය සම්බන්ධයෙන් අසත්‍ය සහ දේවේශ සහගත කරුණු වග උත්තරකරුවන් විසින් අන්තර්ජාලයේ පළ කරමින් සිටින බවයි.
අදාළ ප්‍රචාර තවදුරටත් උඩුගත කිරීම වළක්වමින් කොන්දේසි සහිත ආඥාවක් වග උත්තරකරුවන්ට නිකුත් කරන ලෙසත්, නොතීසි නිකුත් කරන ලෙසත් කළ ඉල්ලීම සලකා බැලීමෙන් අනතුරුව ප්‍රධාන මහේස්ත්‍රාත්වරිය මෙම නියෝගය නිකුත් කරනු ලැබීය.
තවද වග උත්තරකරුවන්ට ලබන 28 දින අධිකරණයේ පෙනී සිට කරුණු දක්වන ලෙසත් මහේස්ත්‍රාත්වරිය නොතීසි නිකුත් කර තිබේ.
