තම පියා වන සුරංග වෙල්ලාලගේ මහතා කොළඹදී හදිසියේ අභාවප්‍රාප්ත වීම හේතුවෙන් ආසියානු කුසලාන ක්‍රිකට් තරඟාවලියට සහභාගි වී සිටින ක්‍රීඩක දුනිත් වෙල්ලාලගේ අද උදෑසන යළි දිවයිනට පැමිණ තිබේ. ඔහු සමඟින් කණ්ඩායම් කළමනාකරු මහින්ද හලංගොඩද පැමිණියේය.
මෙම ඛේදනීය පුවත දුනිත් වෙල්ලාලගේට ලැබී ඇත්තේ, අබුඩාබි හිදී බ්‍රහස්පතින්දා රාත්‍රියේ පැවති කණ්ඩායම් අදියරේ තරගයෙන් අනතුරුව, ක්‍රීඩක ඇඳුම් මාරු කරන කාමරය තුළදීය. මුලින්ම නිවසේ හදිසි වෛද්‍ය තත්ත්වයක් ගැන ඔහුට දැනුම් දුන් කණ්ඩායම් නිලධාරීන්, මිනිත්තු කිහිපයකට පසුව ඔහුගේ පියා අභාවප්‍රාප්ත වූ බව පවසා ඇත.
ප්‍රධාන පුහුණුකරු සනත් ජයසූරිය මෙම පුවත ලැබීමෙන් පසු කඳුළු සලමින් සිටින ක්‍රීඩකයා සනසා . ඉක්මනින්ම කණ්ඩායම් හෝටලයට පැමිණි වෙල්ලාලගේ, ශෝකයෙන් පසුවන සිය පවුල සමඟ එක්වීමට අලුයම ගුවන් යානයකින් කොළඹ බලා පිටත්ව ආවේය.
වැදගත් ජයග්‍රහණයක් ලබාගෙන සිය කණ්ඩායම් අදියරේ පෙරමුණ ගැනීමට සමත් වූ ශ්‍රී ලංකා ක්‍රීඩකයෝ, මෙම ඛේදනීය සිදුවීම හේතුවෙන් විස්මයට හා ශෝකයට පත්විය. ඔවුන් සැමරීම වෙනුවට ක්‍රීඩාංගණයෙන් නිහඬව පිටව ගියහ.
සිකුරාදා ඩුබායිහිදී බංග්ලාදේශයට එරෙහිව සුපිරි හතරේ තරගයකට සූදානම් වන කණ්ඩායම් කළමනාකාරිත්වයට, මෙම අසීරු අවස්ථාවේදී වෙල්ලාලගේට සහ ඔහුගේ පවුලට සහයෝගය ලබා දෙමින් කණ්ඩායමේ මානසිකත්වය යළි නංවාලීමේ අභියෝගයට මුහුණ දීමට සිදුව තිබේ.
