රත්නපුර – කොළඹ ප්‍රධාන මාර්ගයේ මීන්නාන ප්‍රදේශයේ බස් රථයක් සහ කන්ටේනර් රථයක් එකිනෙක ගැටී බිහිසුණු අනතුරක් සිදුව තිබේ.
අද (18) උදෑසන ඇහැළියගොඩ දෙස සිට අවිස්සාවේල්ල දෙසට ධාවනය වූ ලංකා ගමනාගමන මණ්ඩලයට අයත් බස් රථයක් ඊට ප්‍රතිවිරුද්ධ දෙසින් පැමිණි කන්ටේනර් රථයක් මුහුණට මුහුණ ගැටී මෙම අනතුර සිදුව ඇති බව පොලිසිය පවසයි.
මෙම අනතුරින් පසුව කොළඹ – රත්නපුර ප්‍රධාන මාර්ගයේ වාහන ගමනාගමනය පැයක පමණ කාලයක් අවහිර වී තිබුණු බවයි වාර්තා වන්නේ.
අනතුරින් තුවාල ලැබු 23 දෙනෙකු ඇහැළියගොඩ රෝහලට ඇතුළත් කර ඇති අතර ඉන් දෙදෙනෙකු වැඩිදුර ප්‍රතිකාර සඳහා රත්නපුර රෝහලට මාරුකර යවා ඇති බව පොලිසිය පවසයි.
අනතුර සම්බන්ධයෙන් ඇහැළියගොඩ පොලිසිය වැඩිදුර විමර්ශන සිදුකරයි.
