පසුගිය කාලයේ මෙරට වඩාත් කතාබහට ලක් වූ සහ පොලිසියට පවා තර්ජනය කළ සංවිධානාත්මක අපරාධ කල්ලි නායකයන් කිහිපදෙනෙකු ඉන්දුනීසියාවේදී අත්අඩංගුවට ගැනීමට ශ්‍රී ලංකා පොලිසිය සමත්ව ඇත. මෙයට එරට ආරක්ෂක අංශද උපකාර කර ඇති අතර, කෙහෙල්බද්දර පද්මේ, කොමාන්ඩෝ සලින්ත, බැකෝ සමන්, පානදුරේ නිලංග ඇතුළු කිහිපදෙනෙක් මෙසේ අත්අඩංගුවට ගෙන ඇත.
ඉන්දුනීසියාවේ දී සංවිධානාත්මක අපරාධකරුවන් 5 දෙනෙකු එක්වර අත්අඩංගුවට ගැනීම ඉතිහාසයේ මෙවැනි මෙහෙයුමක් සිදු කළ පළමු අවස්ථාව බව පොලිස්පති ප්‍රියන්ත වීරසූරිය පවසයි. සංවිධානාත්මක අපරාධවලට මෙරට දේශපාලනය සම්බන්ධ වූ ඉතිහාසයක් පැවති බව ද කියා සිටි පොලිස්පතිවරයා, වර්තමානයේ එම පරිසරය වෙනස් වී අපරාධකරුවන්ට දේශපාලන රැකවරණය නොමැති පරිසරයක් බිහිවෙමින් පවතින බව පොලිස්පතිවරයා අවධාරණය කරයි.
මෙලෙසම තවත් රටවල් ගණනාවක රැඳී සිටිමින් මෙරට අපරාධ මෙහෙයවන පිරිස් අත්අඩංගුවට ගැනීමට නුදුරේදී කටයුතු කරන බවද පොලිස්පතිවරයා කීවේය.
