පසුගියදා ඉන්දුනීසියාවේ දී අත්අඩංගුවට ගත් කෙහෙල්බද්දර පද්මේ, කොමාන්ඩෝ සලින්ත ඇතුළු පිරිස අත්අඩංගුවට ගැනීමේ ශ්‍රී ලංකා සහ ඉන්දුනීසියානු ඒකාබද්ධ පොලිස් මෙහෙයුුම සම්බන්ධ තොරතුරු මේ වන විට අනාවරණය වී තිබේ.
මෙම මෙහෙයුම පොලිස්පති ප්‍රියන්ත වීරසූරියගේ ඍජු අධීක්ෂණය යටතේ සිදු වී ඇති අතර, අපරාධ පරීක්ෂණ දෙපාර්තමේන්තුව භාර ජ්‍යෙෂ්ඨ නියෝජ්‍ය පොලිස්පති අසංක කරවිටගේ උපදෙස් මත ඒ සඳහා බස්නාහිර උතුර අපරාධ කොට්ඨාසය භාර සහකාර පොලිස් අධිකාරී රොහාන් ඕලුගල හා අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී මහින්ද ජයසුන්දර යන නිලධාරීන් දෙදෙනා මීට දින 7කට පමණ පෙර ඉන්දුනීසියාව බලා පිටත්කර තිබේ.
ඔවුන් විවිධ දුෂ්කරතා මැද සැකකරුවන් රැඳී සිටි නිවාස සංකීර්ණය නිරීක්ෂණය කරමින් සිට තිබේ. කෙසේ වෙතත් පොලිසිය තමන් පසුපස බව තොරතුරු ලද සැකකරුවන් රැඳී සිටි ස්ථානයට ආසන්නයේ වෙනත් සුඛෝපභෝගී නිවාස සංකීර්ණයක් වෙත පළා ගොස් ඇත්තේ කිලෝමීටර් 60ක් පමණ වටවංගු ගසමිනි
කෙසේ වෙතත් ආරක්ෂක අංශ එම ස්ථානයද අනාවරණය කරගෙන සැකකරුවන් අත්අඩංගුවට ගෙන ඇති අතර, එම අවස්ථාවේදී එරට ආරක්ෂක අංශ වෙත ඉන්දුනීසියන් රුපියා කෝටියක් අල්ලසක් දීමට වෑයම් කර ඇති බවද පැවසේ.
එහිදී කෙහෙල්බද්දර පද්මේ, කමාන්ඩෝ සලින්ත හා කුඩු නිලංග අත්අඩංගුවට ගෙන ඇති අතර, ඔවුන් සමග සිටි තවත් පුද්ගලයන් දෙදෙනෙකු හා තුන්හැවිරිදි කුඩා දරුවකු සමග සිටි කාන්තාවක් ද පොලීසිය අත්අඩංගුවට ගනු ලැබීය.
ඔවුන් සම්බන්ධයෙන් සිදුකළ පරීක්ෂා කිරීමේදී අනාවරණ වී ඇත්තේ ඔවුන් කජ්ජා හා දරු දෙදෙනා ඝාතනය කිරීම සම්බන්ධයෙන් චෝදනා එල්ලවී සිටින බැකෝ සමන් හා තැඹිලි ළහිරු යන දෙදෙනා බවය.
අදාළ කාන්තාව හා දරුවා බැකෝ සමන්ගේ බිරිය හා දරුවා බවද එහිදී අනාවරණ වී තිබේ.
මේ වන විට සැකකරුවන් සියලු දෙනා මෙරටට ගෙන්වා ගැනීම සඳහා කටයුතු සිදු කරමින් සිටින බව වාර්තා වේ.
