2026 පාපන්දු ලෝක කුසලානයට සහභාගී වීමට ඉරානයට හැකියාවක් නොමැති බව එරට ක්රීඩා හා යෞවන කටයුතු අමාත්ය අහමඩ් ඩොන්යමාලි පවසයි.
ජුනි 11 වැනිදා ආරම්භ වන එම තරඟාවලිය එක්සත් ජනපදය, කැනඩාව සහ මෙක්සිකෝවේදී පැවැත්වීමට නියමිතයි.
මෙම තරඟාවලියේදී ඉරාන කණ්ඩායම කණ්ඩායම් තරඟ තුනකට ක්රීඩා කිරීමට නියමිත අතර ජුනි 15 සහ 21 යන දිනවල ලොස් ඇන්ජලීස්හිදී නවසීලන්තය සහ බෙල්ජියම සමඟත්, ජුනි 26 වැනිදා සියැටල්හිදී ඊජිප්තුව සමඟත් ඉරානය තරඟ කිරීමට නියමිතය.
නමුත් එක්සත් ජනපදය සහ ඊශ්රායලය උත්තරීතර නායක අයතුල්ලා අලි කමේනි ඝාතනය කරමින් රටට ප්රහාර එල්ල කළ දා සිට ඔවුන්ගේ සහභාගීත්වය සැක සහිත වී තිබේ.
FIFA සභාපති ගියානි ඉන්ෆැන්ටිනෝ පැවසුවේ ඉරානය “තරඟ කිරීමට සාදරයෙන් පිළිගන්නවා” යනුවෙන් එක්සත් ජනපද ජනාධිපති ඩොනල්ඩ් ට්රම්ප් තමාට පැවසූ බවයි.
නමුත් IRIB ක්රීඩා ජාලය සමඟ සම්මුඛ සාකච්ඡාවකට එක්වෙමින් “මෙම දූෂිත රජය අපගේ නායකයා ඝාතනය කර ඇති බැවින්, කිසිදු තත්ත්වයක් යටතේ ලෝක කුසලානයට සහභාගී වීමට අපට සුදුසු තත්ත්වයක් නැහැ. අපේ ළමයි ටිකට ආරක්ෂිත නැහැ, සහ සහභාගීත්වය සඳහා තත්ත්වයක් නැහැ. පසුගිය මාස අටක් හෝ නවයක් තුළ, යුද්ධ දෙකක් අප මත පටවා තිබෙනවා, අපගේ ජනතාවගෙන් දහස් ගණනක් මරා දමා ප්රාණ පරිත්යාග කර තිබෙනවා. එබැවින්, අපට සහභාගී වීමට හැකියාවක් නැහැ” යනුවෙන් ඩොන්යමාලි පැවසීය.
මේ අතර ඉරානයේ කාන්තා ජාතික කණ්ඩායමේ සාමාජිකයන් හය දෙනෙකුට ඔවුන්ගේ ආරක්ෂාව වෙනුවෙන් ඕස්ට්රේලියාවෙන් ‘මානුෂීය’ වීසා ලැබී තිබුණි.
