කොලොම්බියාව, එක්සත් ජනපද හමුදා ක්රියාමාර්ගයේ ‘සැබෑ තර්ජනයක්’ දකින බව එරට ජනාධිපති ගුස්ටාවෝ පෙට්රෝ පවසයි.
ඔහු මේ බව පවසන්නේ BBC ලෝක සේවය සමඟ සාකච්ජාවකට එක්වෙමිනි.
ජනාධිපති පෙට්රෝ පවසන්නේ එක්සත් ජනපදය අනෙකුත් ජාතීන්ට එක්සත් ජනපද “අධිරාජ්යයක” කොටසක් ලෙස සලකන බවයි. ඇමරිකානු ජනාධිපතිවරයාගේ එම ස්ථාවරය එක්සත් ජනපදය “ලෝකය ආධිපත්යය දරන” තැන සිට “ලෝකයෙන් හුදකලා” බවට පරිවර්තනය වීමේ අවදානමක් ද ඇති බවයි ජනාධිපති පෙට්රෝ සඳහන් කරන්නේ.
එක්සත් ජනපද ආගමන සහ රේගු බලාත්මක කිරීමේ (ICE) නියෝජිතයන් “නාසි බලකායන්” මෙන් ක්රියා කරන බවට ද ඔහු චෝදනා කරයි.
වෙනිසියුලාවට එල්ල කරන ලද එක්සත් ජනපද ප්රහාර සහ නිකොලස් මදුරෝ අල්ලා ගැනීමෙන් පසුව, එක්සත් ජනපද ජනාධිපති ඩොනල්ඩ් ට්රම්ප් පැවසුවේ කොලොම්බියාව ඉලක්ක කරගත් හමුදා මෙහෙයුමක් “හොඳයි” යනුවෙනි.
ට්රම්ප් නැවත නැවතත් පෙට්රෝට “ඔහුගේ බූරුවා ගැන බලාගන්න” යැයි පැවසීමද පෙට්රෝ දැඩි ලෙස හෙළා දැක තිබේ.
ට්රම්ප් සහ පෙට්රෝ පසුගිය බදාදා දුරකථනයෙන් කතා කර ඇති අතර අනතුරුව ට්රම්ප් පවසා තිබුණේ නුදුරු අනාගතයේ දී ධවල මන්දිරයේදී තම කොලොම්බියානු සහචරයා හමුවන බවයි.
එම ඇමතුමෙන් අනතුරුව ජනාධිපති ට්රම්ප් සිය Truth Social වේදිකාවේ සටහන් කර තිබුණේ පෙට්රෝ සමඟ කළ සංවාදය “මහා ගෞරවයක්” බවය.
එහෙත් ඒ සම්බන්ධයෙන් කොලොම්බියා ජනාධිපතිවරයා පසුවන ස්ථාවරය අනුව ට්රම්ප් පවසන අන්දමේ සැලකිය යුතු සබඳතාවක් ගොඩනැගී නැත.
අදාළ ඇමතුම පැයකට අඩු කාලයක් පැවති ඇති අතර එහිදී ට්රම්ප් වැඩි වශයෙන් අවධාරණය කර ඇත්තේ ඔහුගේ අත්පත් කරගැනීම්, කොලොම්බියාවේ මත්ද්රව්ය ජාවාරම, වෙනිසියුලාව පිළිබඳ කොලොම්බියාවේ දැක්ම සහ එක්සත් ජනපදය සම්බන්ධයෙන් ලතින් ඇමරිකාව වටා සිදුවන දේ යනාදියයි.
ජනාධිපති ට්රම්ප් බොහෝ විට එක්සත් ජනපදයේ අපරාධ සහ ජාවාරම සඳහා සංක්රමණවලට දොස් පවරා ඇති අතර එය මහා පරිමාණ බලාත්මක කිරීමේ මෙහෙයුම් සාධාරණීකරණය කිරීමට භාවිතා කරන බව පෙනී යයි. කොලොම්බියාව සහ වෙනිසියුලාව වැනි රටවල් මත්ද්රව්ය ජාවාරම මැඩපැවැත්වීමට ප්රමාණවත් ලෙස කටයුතු නොකරන බවට ද චෝදනා කර තිබේ.
කෙසේවෙතත් කොලොම්බියා ජනාධිපති සහ ඇමරිකානු ජනාධිපති අතර මතභේදාත්මක තත්ත්වයක් පවතින අතර දෙපාර්ශවය ජාත්යන්තර වෙළෙඳාමට අදාළව ද බලපෑම් කර ගනිති.
වෙනිසියුලාවට එරෙහි එක්සත් ජනපදයේ මිලිටරි ක්රියාමාර්ගයෙන් පසුව, “තෙල් සහ ගල් අඟුරු” සඳහා යුද්ධ සොයන බවට වොෂින්ටනයට චෝදනා කළ පෙට්රෝ, පොසිල ඉන්ධන භාවිතය අඩු කිරීමෙන් ගෝලීය උෂ්ණත්වය ඉහළ යාම සීමා කිරීමට රටවල් එකඟ වූ පැරිස් ගිවිසුමෙන් එක්සත් ජනපදය ඉවත් නොවූයේ නම්, “යුද්ධ ඇති නොවනු ඇත, ලෝකය සමඟ වඩාත් ප්රජාතන්ත්රවාදී සහ සාමකාමී සම්බන්ධතාවයක් ඇති වනු ඇත” යනුවෙන් පවසා තිබේ.
අදාළ සාකච්ජාව අතරතුර එක්සත් ජනපද ප්රහාරයකදී කොලොම්බියාව ආරක්ෂා වන්නේ කෙසේද යන්න පිළිබඳ කරන විමසීමට ජනාධිපති පෙට්රෝ පවසන්නේ ඒ සම්බන්ධයෙන් සංවාද ගතවීමට තමන් කැමති බවත් දැනටමත් ඒ පිළිබඳ කටයුතු කරමින් පවතින බවත්ය.
නමුත් ඔහු තවදුරටත් පවසන්නේ “කොලොම්බියාවේ ඉතිහාසය විශාල හමුදාවන්ට ප්රතිචාර දක්වා ඇති ආකාරය පෙන්නුම් කරයි.” යනුවෙනි.
“ප්රශ්නය අප සතුව නොමැති ආයුධ සමඟ විශාල හමුදාවකට මුහුණ දීම ගැන නොවේ. අපට ගුවන් යානා නාශක ආරක්ෂක පද්ධති පවා නැත. ඒ වෙනුවට අපි සැමවිටම මෙන් ජනතාව, අපගේ කඳු සහ අපගේ වනාන්තර මත විශ්වාසය තබමු.” යනුවෙන් පෙට්රෝ තවදුරටත් පවසයි.
ලොව විශාලතම කොකේන් නිෂ්පාදකයා ලෙස කොලොම්බියාව ගෝලීය මත්ද්රව්ය වෙළඳාම සඳහා ප්රධාන මධ්යස්ථානයක් සැලකෙයි. එහි සැලකිය යුතු තෙල් සංචිත මෙන්ම රන්, රිදී, මරකත, ප්ලැටිනම් සහ ගල් අඟුරු ද තිබේ.
වෙනිසියුලාවේ මෙහෙයුමෙන් පසු එයාර් ෆෝස් වන් නෞකාවේදී කතා කරමින් ට්රම්ප් පෙට්රෝ ගැනද කතා කර තිබුණි. එහිදී ඔහු පැවසුවේ පෙට්රෝ, “කොකේන් සාදා එක්සත් ජනපදයට විකිණීමට කැමති රෝගී මිනිසෙකු” ලෙස විස්තර කළේය. එහෙත් “ඔහු එය දිගු කලක් නොකරනු ඇත” යනුවෙන් ද ට්රම්ප් තවදුරටත් පැවසීය.
පෙට්රෝ එම ප්රකාශ ප්රතික්ෂේප කළ අතර, “මම එයට සම්බන්ධ නැති බව සැමවිටම ඔප්පු වී ඇත” යනුවෙන් සඳහන් කරයි.
වසර 20 ක් තිස්සේ තමන් මත්ද්රව්ය ජාවාරම්කරුවන්ට එරෙහිව සටන් කරමින් සිටින අතර එහි ප්රතිඵලය සිය පවුලට පිටුවහල් වීමට සිදුවීම බවද ඔහු පවසයි.
හිටපු ගරිල්ලා සාමාජිකයෙකු වන පෙට්රෝ බලයට පත්වීමෙන් පසු “සම්පූර්ණ සාමය” උපාය මාර්ගයක් අනුගමනය කර තිබෙන අතර සන්නද්ධ කණ්ඩායම් සමඟ සංවාදයට ප්රමුඛත්වය දී තිබේ. එම ප්රවේශය ඉතා මෘදු බවද විචාරකයින් පෙන්වා දී ඇත.
