සමාජ මාධ්‍ය තහනම නිසා උත්සන්න වූ නේපාලයේ ජනතා උද්ඝෝෂණ දැඩි වී තිබේ. නේපාල අගමැති කේ.පී. ෂර්මා ඔලී ඉල්ලා අස්වී ඇතැයි විදේශ මාධ්‍ය වාර්තා කරයි. ඔහු ප්‍රකාශ කළේ අර්බුදයට ව්‍යවස්ථාමය විසඳුමක් සඳහා මග සලසා දීමට තමා මෙලෙස ඉල්ලා අස්වූ බවයි.
අගමැති ඔලී සහ හිටපු අගමැති ෂේර් බහදූර් දියුබා ඇතුළු ඉහළ පෙළේ දේශපාලනඥයින්ගේ නිවාස කිහිපයකට උද්ඝෝෂකයින් විසින් පහර දී, හානි සිදු කරන ලදී. දේශපාලන පක්ෂ මූලස්ථාන ද මෙම ප්‍රහාරවලට ලක් විය.
විරෝධතාකරුවන් පසුපසට තල්ලු කිරීම සඳහා සන්නද්ධ පොලිසිය කඳුළු ගෑස් ප්‍රහාර එල්ල කරන ලදී. තරුණ පිරිස් වැඩි වැඩියෙන් කාත්මණ්ඩු සහ රටේ අනෙකුත් ප්‍රදේශවල වීදිවලට එකතු වීමත් සමඟ තත්ත්වය තවත් උග්‍ර විය.
ජල සම්පාදන අමාත්‍ය ප්‍රදීප් යාදව් රජයේ දැඩි මර්දනයට විරෝධය පළ කරමින් සිය ධුරයෙන් ඉල්ලා අස්විය. කෘෂිකර්ම සහ පශු සම්පත් අමාත්‍ය රාම් නාත් අධිකාරී සහ ස්වදේශ කටයුතු අමාත්‍ය රමේෂ් ලෙඛක් ද සිය ඉල්ලා අස්වීම් ඉදිරිපත් කළහ.
නේපාල ගුවන් සේවා අධිකාරියට අනුව, ආරක්ෂක ගැටලු හේතුවෙන් කාත්මණ්ඩුහි ත්‍රිභුවන ජාත්‍යන්තර ගුවන් තොටුපළේ දේශීය ගුවන් ගමන් “සම්පූර්ණයෙන්ම පාහේ ඇණහිට ඇත”.
