රාජ්‍ය මුදල් අවභාවිතාවක් සම්බන්ධයෙන් වන චෝදනා සම්බන්ධ නඩුකරයකට අදාළව අත්අඩංගුවට ගෙන රක්ෂිත බන්ධනාගාරගත කරනු ලැබූ හිටපු ජනපති රනිල් වික්‍රමසිංහ වෙත ඇප ලබා ගැනීම වෙනුවෙන් කරුණු දැක්වූ ඔහුගේ නීතිඥයන් ඔහුට ඇති අසනීප තත්වයන් පිළිබඳ දැක්වූ කරුණු මේ වන විට සමාජ කතාබහක් ඇති කර තිබේ.
බොහෝ දෙනා පවසන්නේ, මෙතරම් ලෙඩ රෝග ප්‍රමාණයක් සහිතව හිටපු ජනපතිවරයා මෙතෙක් කල් ජීවත්වීම පවා විස්මයජනක බවයි. කෙසේ වෙතත්, විත්තිකාර හිටපු ජනපතිවරයාගේ නීතිඥ අනුජ ප්‍රේමරත්නගේ කරුණු දැක්වීම්වලදී කියා සිටියේ සිය සේවා දායකයාට නින්දේදි විනාඩි 2-3ක් හුස්ම හිරවෙන ආබාධයක් ඇති බවයි. ඔහු දැක්වූ අදහස් කොටසක් පහත පළ වෙයි.
” ස්වාමිනි මාගේ සේවාදායකයාගේ වර්තමාන සෞඛ්‍ය තත්ත්වය පිළිබඳ මම පැහැදිලි කරන්න කැමතියි. ඔහුගේ හෘද වස්තුවේ පටක මියයාමක් තියෙනවා. හෘද වස්තුවේ ප්‍රධාන ධමනි 04න් 03ක්ම අවහිරවෙලා. සැත්කමක් කරන්න බැහැ හෘදයට ළඟ නිසා. මොහුට නිදන්ගත වකුගඩු රෝගී තත්ත්වයක් තියෙනවා. නින්දෙන් හුස්ම සිරවීමේ රෝගී තත්ත්වයක් තියෙනවා. සමහරවිට විනාඩි 2ක් – 3ක් සිරවී තිබෙනවා. මේ තත්ත්වය තේරුම්ගන්න පුළුවන් ගොරවන සද්දය අනුවයි. ඒක තේරුම්ගන්න පළපුරුදු කෙනෙක් ඉන්න ඕනේ. මොහුගේ බිරිඳව එකට පුරුදු කරලා තියෙන්නේ. මේ තත්ත්වය මත මොහු නිදාගද්දි CPAP නම් මැෂින් එකකට සම්බන්ධ කරනවා. මේක නොමැති වුණොත් හෘදය නැවතීමට පවා පුළුවන්. මොහුට පෙනහළු ආසාදනයක් තියෙනවා. ශරීරයේ සෝඩියම් අඩුයි. අධි රුධීර පීඩනය, කැරකිල්ල තියෙනවා. ක්ෂණික හෘදයාබාදයක් ඇති වීමේ සම්භාවිතාවක් තියෙනවා. අග්න්‍යාශයේ උඩ කොටසේ ආසාදනයක්. මේ සියලු රෝගී තත්ත්වයන් මත ශරීරයේ ප්‍රතිශක්තීකරණය අඩුවෙලා තියෙන්නේ. ස්වාමිනි කෙටියෙන් කිව්වොත් මොහුට තියෙන්න ඕන ඔක්කෝම ලෙඩ ටික තියෙනවා. රනිල් වික්‍රමසිංහ නැමැති මගේ සේවාදායකයා ඉන්නේ බලවත් ජීවිත අවදානමක. එබැවින් තත්ත්වය සුවිශේෂි කරුණු ලෙස සලකා මොහු ඇප මත මුදාහරින්න කියා මා ඉල්ලා සිටිනවා. “
