ජාත්‍යන්තර සංචාරක ව්‍යාපාරය සඳහා දොර විවර කරමින් හා සෞදි අරාබි රාජධානියේ මූලධර්මවාදී ප්‍රවේශයේ ඓතිහාසික වෙනසක් සංකේතවත් කරමින්, 2026 වන විට සෞදි අරාබිය නම් කරන ලද සංචාරක කලාප 600 ක මත්පැන් සඳහා ඉදිරියේදී අවසර දෙනු ඇත.
තෝරාගත් තරු පහේ හෝටල්, නිවාඩු නිකේතන සහ බලපත්‍රලාභී පහසුකම් සපයන ස්ථානවල වයින් සහ බියර් විකිණීමට සහ පරිභෝජනයට ඉඩ සලසන මෙම තීරණය, සෞදි අරාබියේ ආර්ථිකය විවිධාංගීකරණය කිරීමට සහ සංචාරක කර්මාන්තයට නැඹුරු ගල්ෆ් අසල්වැසි රටවල් සමඟ තරඟ කිරීමට ඇති පුළුල් සැලැස්මේ කොටසක් ලෙස සැලකේ.
දැඩි ලෙස පාලනය කරන ලද මත්පැන් හඳුන්වාදීම
මෙම ප්‍රතිපත්තිය මඟින් මත්පැන් සඳහා අවසර දෙනු ලබන්නේ ඉහළ පෙළේ හෝටල්, නිවාඩු ගතකිරීමට පහසුකම් සපයන ගම්මාන සහ බලපත්‍රලාභී නියෝජිත ආයතන වැනි සංචාරක කේන්ද්‍රීය ස්ථාන තුළ පමණි. පොදු ප්‍රදේශ, පෞද්ගලික නිවාස සහ සුපිරි සහ සිල්ලර වෙළඳසැල් වත්මන් සීමාවන් යටතේම පවතිනු ඇත. මෙම තීරණය එළිදැක්වීම, සෞදි අරාබිය ජාත්‍යන්තර සංචාරක ව්‍යාපාරයට පුළුල්ව දොර විවෘත කිරීම සහ එහි ඉස්ලාමීය සංස්කෘතික අනන්‍යතාවය පවත්වා ගැනීම අතර රටේ ප්‍රවේශම් සහගත සමතුලිතතාවය පෙන්නුම් කරයි.
මෙම සැලැස්ම මගින් මත්පැන් පරිභෝජනය සීමා විවෘත කරන්නේ, බලපත්‍ර සහිත ජාත්‍යන්තර සංචාරක පරිශ්‍රයන්හී පරිභෝජනය සඳහා පමණි. ඉන් ඉවත රැගෙන යාම හෝ සිල්ලර වෙළඳාමක් කිසිසේත් සිදු නොවනු ඇත.
නව ආරම්භය යටතේ අවසර දී ඇති මූලික මත්පැන් වර්ග වන්නේ වයින් සහ බියර් පමණයි. සංස්කෘතික සම්මතයන් සම්පූර්ණයෙන්ම අත් නොහැර, සීමාවන් ලිහිල් කිරීම තුලින් සංචාරක ආදායම් ඉලක්ක සහ ආර්ථික විවිධාංගීකරණය ඉදිරියට ගෙන ආවත්, සෞදි අරාබියේ අභිප්‍රාය ඉලක්ක කරමින්, මධ්‍යසාර තවමත් තහනම් කර ඇත.
මෙම සන්ධිස්ථානීය තීරණය සෞදි අරාබියේ “2030 දැක්ම” න්‍යාය පත්‍රය සමඟ සමීපව බැඳී ඇති අතර, එය සංචාරක, විනෝදාස්වාදය සහ ජාත්‍යන්තර ආයෝජන වැනි අංශ ඉහළ නැංවීම මගින් තෙල් ආදායම මත රටෙහි යැපීම අඩු කිරීම අරමුණු කරයි. විශේෂයෙන් මත්පැන් හෙවත් මධ්‍යසාර ඇතුළත් කිරීම සැලසුම් කර ඇත්තේ, සංචාරක අත්දැකීමේ සාමාන්‍ය කොටසක් ලෙස සලකනු ලබන රටවලින් පැමිණෙන වැඩි ගෝලීය සැරිසරන්නන් ආකර්ෂණය කර ගැනීම සඳහාය.
සෞදි අරාබිය, එක්සත් අරාබි එමීර් රාජ්‍යය හෝ බහරේනය වැනි ගමනාන්ත තෝරාගන්නා සංචාරකයින් ඉලක්ක කර ගනිමින් සිටී. එම රටවල මත්පැන් අලෙවිය දැනටමත් සංචාරක ආර්ථිකයට ඒකාබද්ධ වී ඇත. එම රටවල ආගන්තුක සත්කාර අංශවල මත්පැන් ආශ්‍රිත ආදායම සැලකිය යුතු කාර්යභාරයක් ඉටු කරයි.
ලෝක කුසලානයේ බලපෑම සහ කලාපීය උපාය මාර්ගය
සවුදි අරාබිය 2034 වසරේ FIFA ලෝක කුසලාන පාපන්දු තරඟාවලියට සත්කාරකත්වය ලැබීම, මෙම වෙනස සිදු වූ කාලය තුළ සැලකිය යුතු කාර්යභාරයක් ඉටු කළ බව විශේෂඥයින් විශ්වාස කරයි. FIFA තරඟාවලියේ ගෝලීය ස්වභාවය අනුව මිලියන ගණනක් රසිකයන්, කණ්ඩායම් සහ නිලධාරීන් ආකර්ෂණය කර ගැනීමට ඉඩ ඇති අතර, ඔවුන්ගෙන් බොහෝ දෙනෙක් තම පෞද්ගලික වුවමනාවන් තුළ මත්පැන් සඳහා ප්‍රවේශය ඇතුළුව ජාත්‍යන්තර ප්‍රමිතියෙන් යුත් ආගන්තුක සත්කාර පිරිනැමීම් අපේක්ෂා කරති.
මෙම මහා පරිමාණ සිදුවීම් සඳහා සූදානම් වීමේ දී, සෞදි රජය මෙම පියවරට සහාය දක්වන ප්‍රධාන හෝටල් දාමයන් සහ උත්සව සංවිධායකයින් සමඟ සාකච්ඡා කරමින් සිටින බවද වාර්තා වේ. සේවා ලබා ගැනීමේ හැකියාව සහ අත්දැකීම් නිර්මාණයේ අපේක්ෂිත වෙනස්කම් සමඟ ගැලපෙන පරිදි, සංචාරක ව්‍යාපාරිකයන් දැනටමත් තම සංචාරක පැකේජ සංශෝධනය කිරීම ආරම්භ කර ඇත.
ජාත්‍යන්තර සංචාරකයින් ආකර්ෂණය කර ගැනීම සඳහා සෞදි අරාබිය නව ප්‍රතිපත්තියකට යොමුනව විට,
ගල්ෆ් සංචාරකයන් සඳහා ජනප්‍රිය කෙටි කාලීන ගමනාන්තයක් වන එක්සත් අරාබි එමීර් රාජ්‍යයේ හෝටල්, බාර් සහ බලපත්‍රලාභී වෙළඳසැල්වල මත්පැන් ලබා ගත හැකිය. ප්‍රධාන සංචාරක ආකර්ෂණීය ස්ථාන ලෙස, විශේෂයෙන් ඩුබායි, අබුඩාබි හි හා බහරේන් සංචාරක කලාපවල පුළුල් ලෙස මත්පැන් ලබා ගත හැකිය.
(වෙදත් ඔස්ගර් ටෝර්ගේ සටහනක් ඇසුරෙන් පරිවර්තනය ජයන්ත වැලිවිට විසිනි.)
