පසුගිය දා ඉන්දුනීසියාවේදී අත්අඩංගුවට ගනු ලැබූ මෙරට ප්‍රබල සංවිධානාත්මක අපරාධ කල්ලි නායකයන් ලෙස සැලකෙන කෙහෙල්බද්දර පද්මේ, කොමාන්ඩෝ සලින්ත, පානදුරේ නිලංග ඇතුළු පිරිස ඊයේ (30) පස්වරුවේදී මෙරටට රැගෙන එනු ලැබීය. ජනපතිවරයාගේ සහ පොලිස්පතිවරයාගේ ඍජු මැදිහත්වීමෙන් මෙම මෙහෙයුම ක්‍රියාත්මක කරනු ලැබූ බව සඳහන් වේ.
ගනේමුල්ලේ සංජීව නමැති සංවිධානාත්මක අපරාධ කල්ලි නායකයාට අලුත්කඩේ අධිකරණ සංකීර්ණය තුළදීම වෙඩි තබා ඝාතනය කිරීම ඇතුළු අපරාධ ගණනාවකට කෙහෙල්බද්දර පද්මේ හෙවත් මන්දිනු නමැති අය වගකිව යුතු බව පැවසේ. කෙසේ වෙතත්, ඔහු සැඟව සිටිමින් මාධ්‍ය වෙත ප්‍රකාශද නිකුත් කළ අතර පොලිස් නිලධාරියෙකුට තර්ජනය කිරීමක් ගැනද වාර්තා විය.
මෙලෙස අත්අඩංගුවට පත් කෙහෙල්බද්දර පද්මේ, කමාන්ඩෝ සලින්ත සහ පානදුරේ නිලංග යන තිදෙනා ඉදිරි විමර්ශන සඳහා අපරාධ පරික්ෂණ දෙපාර්තමේන්තුව වෙත රැගෙන ගොස් ඇත.
එමෙන්ම දිවයිනට රැගෙන ආ සංවිධානාත්මක අපරාධකරුවන් වන බැකෝ සමන් සහ තැඹිලි ළහිරු යන දෙදෙනා වැඩිදුර විමර්ශන සඳහා බස්නාහිර උතුර අපරාධ විමර්ශන කොට්ඨාසයට භාරදී තිබේ.
මහජන ආරක්ෂක අමාත්‍ය ආනන්ද විජේපාල මාධ්‍ය හමුවේ අදහස් දක්වමින් කියා සිටියේ, ජනයා පීඩාවට පත් කරමින් කරගෙන ගිය අපරාධ නැවැත්වීමට දැන් කාලය පැමිණ ඇති බවයි.
ඔහු වැඩිදුරටත් මෙසේ ප්‍රකාශ කළේ ය.
”ප්‍රධානපෙළේ අපරාධ කල්ලියක් වශයෙන් කටයුතු කරපු, කෙහෙල්බද්දර පද්මේ කමාන්ඩර් සලිඳු ඇතුළු සංවිධානාත්මක අපරාධකරුවන් පස් දෙනෙක් ඉන්දුනීසියාවේ ඉඳලා අද ලංකාවට රැගෙන ආවා. මේ වෙනකොට ඔවුන් සියලු දෙනා අපරාධ පරීක්ෂණ දෙපාර්තමේන්තුවේ අත්අඩංගුවට පත්වුණා. විශේෂයෙන් මේ ක්‍රියාන්විතයේදී මං හිතන්නේ අපි දීර්ඝ කාලයක් සැලසුම් කරලා විශේෂයෙන් පොලිසිය, පොලිස්පතිතුමා, විශේෂයෙන් අපරාධ පරීක්ෂණ දෙපාර්තමේන්තුව ඇතුළු කණ්ඩායමක් මේ පිළිබඳ දීර්ඝ කාලයක් තිස්සේ සැලසුම් කරලා දින හතක් පමණ ඉන්දුනීසියාවේ පොලිසිය සමඟ ඒකාබද්ධ මෙහෙයුමක නිරත වෙලා ඔවුන් අත්අඩංගුවට අරන් අද මේ රටට ගෙනාවා. ඔබ දන්නවා මේ සංවිධානාත්මක අපරාධ කණ්ඩායම් දීර්ඝ කාලයක් තිස්සේ මේ රටේ වර්ධනය වුණේ දේශපාලඥයන්ගේ ආශිර්වාදය සහිතව. ඔවුන්ගේ බලය පවත්වා ගැනීම සඳහා මේ සංවිධානාත්මක අපරාධ කණ්ඩායම් භාවිතා කළා. ඒ වගේම ඔවුන් බලය පවත්වාගෙන යාම සඳහා මේ කණ්ඩායම් භාවිතා කළා වගේම ඔවුන් විවිධ ප්‍රයෝජන ඔවුන්ගෙන් ලබාගත්තා. ඔවුන්ගේ දේපල විශේෂයෙන් දේශපාලඥයන්ගේ අවශ්‍යතා සඳහා යොදාගෙන තිබුණු අවස්ථා අපිට මේ වෙනකොට අනාවරණය වෙලා තියෙනවා. ඒ හින්දා දැන් මේ අත්අඩංගුවට ගත් කණ්ඩායම් පිළිබඳව ගැඹුරු විමර්ශනයක් සිද්ධ කරන්න අපරාධ පරීක්ෂණ දෙපාර්තමේන්තුවට මේ වෙනකොට පොලිස්පතිවරයා නියෝග ලබා දීලා තියෙනවා. අපි මේ පිළිබඳව පුළුල් විමර්ශනයක් කරනවා. මේ පිළිබඳ ගැඹුරු විමර්ශනයක් කරනවා. අපි මේ රටේ ජනතාවට සහතිකයක් දෙනවා මේ පාතාල අපරාධ තවදුරටත් මේ රටේ ජනයා, පීඩාවට පත් කරමින් මේ කරන මේ දේවල් නැවැත්වීමට දැන් කාලය ඇවිල්ලයි කියලා. ”
