ඉරාන න්‍යෂ්ටික වැඩසටහනට අයත් ටෙහෙරාන්හි යටිතල පහසුකම් සපයන ස්ථාන ඉලක්ක කර ඊශ්‍රායෙලය විසින් නැවත ප්‍රහාර මාලාවක් එල්ල කර තිබෙන බව විදෙස් මාධ්‍ය වාර්තා කරයි.
මෙම ඉලක්ක අතර ඉරාන ආරක්ෂක මූලස්ථානය සහ වැදගත් ආරක්ෂක මර්මස්ථානද තිබෙන බව සැලයි. ඒ අතර ඉරාන තෙල් ගබඩාවකටද හානි සිදුව ඇතැයි කියැවේ.
ඒ අතර ඉරානය කඩිනමින් ප්‍රතිප්‍රහාරවලට යොමුව ඇත. ඩ්‍රෝන සහ මිසයිලවලිනි.
ඊශ්‍රායෙල් අගමැති නෙතන්යාහු ආරක්ෂක කැබිනට් මණ්ඩලය රැස් කර ඇත. ඉරානය ප්‍රහාර තීව්‍ර කරන්නට යන බව දැනගන්නට ඇති අතර එක්සත් ජනපදය, එක්සත් රාජධානිය, සහ ප්‍රංශය වෙත ඉරානය අනතුරු අඟවනු ලැබුවේ ඊශ්‍රායෙලය ආරක්ෂා කිරීමට තැත් කරන්නේ නම් එම රටවල් තුනට අදාළ කලාපයේ යුද ඉලක්කවලටද තමන් පහර දෙන බවයි.
ඉරානය විසින් ඊශ්‍රායලයේ ටෙල්අවීව්, හයිෆා සහ අවට ප්‍රදේශ ඉලක්ක කර ගනිමින් එල්ල කළ ප්‍රහාර හේතුවෙන් ශ්‍රී ලාංකික කාන්තාවක් තුවාල ලබා ඇතැයි ද ඒ අතර වාර්තා විය.
ඉරාන සන්නද්ධ හමුදාවන්ගේ ප්‍රකාශක බ්‍රිගේඩියර් ජෙනරාල් අබොල්ෆාස්ල් ෂෙකර්චි සිකුරාදා උදෑසන පැවසුවේ, ඊශ්‍රායලය විශාල මිලක් ගෙවනු ඇති බවත්, ඉරාන සන්නද්ධ හමුදාවන්ගෙන් ශක්තිමත් ප්‍රතිචාර අපේක්ෂා කළ යුතු බවත්ය. ඉරානය සියයට සියයක් මිලිටරි සූදානමක තබා ඇති අතර සතුරාට දැඩි පහරක් ලබාදෙනු ඇති බව ඔහු පැවසීය.
ඊශ්‍රායල පළමු ප්‍රහාරය සිකුරාදා දේශීය වේලාවෙන් අලුයම 3:00 ට පමණ ටෙහෙරාන් අගනුවරදී වාර්තා වූ අතර, පසුව රට පුරා තවත් පළාත් කිහිපයක පිපිරීම් මාලාවක් සිදුවිය. සමාජ මාධ්‍යවල සංසරණය වන වීඩියෝ දර්ශනවලින් පෙනී යන්නේ, අවිචාරවත් ඊශ්‍රායල ආක්‍රමණ ලෙස විස්තර කර ඇති දෙයක ප්‍රතිඵලයක් ලෙස ටෙහෙරානයේ සහ අනෙකුත් ප්‍රදේශවල නේවාසික ප්‍රදේශවල පුළුල් විනාශයක් සිදු වූ බවයි. නටාන්ස්, කොරාමාබාද්, කොන්ඩබ් සහ තවත් ස්ථාන කිහිපයක ස්ථාන ඉලක්ක කරගත් බව පවසමින් ඊශ්‍රායලය ප්‍රහාරවල වගකීම තහවුරු කළේය.
ඒ අතර මැදපෙරදිග යුධ උණුසුම් තත්ත්වය පිලිබඳව ජනාධිපති පුටින්, ජනාධිපති ට්‍රම්ප් සමඟ දුරකතන කතාබහක යෙදුණු බව ජනාධිපති පුටින්ගේ කාර්යමණ්ඩල සහායක යූරි උෂාකොව්ගේ ප්‍රකාශ කළේය. මෙම දුරකතන කතාබහ විනාඩි 50 ක් පුරා සිදුව තිබේ.
මැද පෙරදිග තත්ත්වය උත්සන්න වීම පිළිබඳව නායකයින් දෙදෙනා අතර ප්‍රයෝජනවත් සංවාදය සිදුවී ඇත.
ඉරාන ජනාධිපතිවරයා සහ ඊශ්‍රායල අගමැතිවරයා සමඟ පැවති දුරකතන සාකච්ඡා පිළිබඳව පුටින් ට්‍රම්ප්ට දැනුම් දී ඇත.
ඉරාන න්‍යෂ්ටික ගැටලුව සම්බන්ධයෙන් අන්‍යෝන්‍ය වශයෙන් පිළිගත හැකි ගිවිසුම් සඳහා උත්සාහ කිරීමට රුසියාවේ යෝජනාව පුටින් විසින් ට්‍රම්ප්ට මතක් කර දුන්නේය.
මැද පෙරදිග තත්ත්වය ඉතා භයානක බව ට්‍රම්ප් තක්සේරු කර ඇත.
ඉරාන න්‍යෂ්ටික වැඩසටහන පිළිබඳ සාකච්ඡා මාර්ගයට නැවත පැමිණීම ජනාධිපතිවරු ප්‍රතික්ෂේප කළේ නැත.
පසුගිය ජුනි 2 වන දින රුසියාව- යුක්‍රේනය අතර තුර්කියේ දී ඇති කරගත් ඉස්තාන්බුල් එකඟතා ක්‍රියාත්මක කිරීම පිළිබඳව ද පුටින් ට්‍රම්ප්ට දැනුම් දුන්නේය.
රුසියාව යුක්රේන පාර්ශවය සමඟ සාකච්ඡා දිගටම කරගෙන යාමට සූදානම් බව පුටින් පැවසා ඇත.
ට්‍රම්ප්ගේ උපන්දිනය සහ ධජ දිනය වෙනුවෙන් පුටින් ඔහුට සුබ පැතීය.
සංවාදය අතරතුර නායකයින්, දෙවන ලෝක යුද්ධ සමයේදී දෙරටේ යුධකාලීන සහයෝගය සිහි කළ අතර ඔවුන්ගේ වර්තමාන සම්බන්ධතාවය පිළිබඳව තෘප්තිමත් බව ප්‍රකාශ වී ඇති අතර එමඟින් දැවෙන ගැටලු විසඳීමට ඉඩ සැලසේ යැයි දෙදෙනා විශ්වාසය පළ කළහ.
