සිය පාලනයක් යටතේ අරගලය සම්බන්ධයෙන් හා ඊට විදේශයන්ගෙන් මුදල් ලැබුණු ආකාරය සම්බන්ධයෙන් කොමිසමක් පත් කර සොයා බලන බව ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පැවසීය.
ඒ, අද (13) ශ්රී අලංකා පොදුජන පෙරමුණේ ප්රධාන කාර්යාලයේ පැවති වැඩසටහනකින් අනතුරුව මාධ්ය වෙත අදහස් දක්වමිනි.
අරගලය මෙහෙයවූ පිරිසක් රජ වීමත් ඒ වෙනුවෙන් බිල්ලට ගිය තවත් 12ක් එල්ලුම් ගස් යාමත් දැන් සිදුව ඇති බවයි මන්ත්රීවරයා සඳහන් කළේ.
”අරගලය සම්බන්ධයෙන් සහ එයට විදේශයන්ගෙන් ලැබුණු මුදල් සම්බන්ධයෙන් ජනාධිපති කොමිසමක් පත්කරලා ඒ කාරණය පිළිබඳ හොයනවා. මොකද ඇමරිකානු වර්තමාන ජනාධිපතිවරයා පවා ලංකාව සහ බංග්ලාදේශය ඇතුළු රටවල් කිහිපයක ආණ්ඩු වෙනස් කරන්න විදේශ මුදල් ආයෝජනය කරපු ආකාරය පිළිබඳ USAID හරහා මුදල් ආයෝජනය කරන්න කියන කාරණය සඳහන් කරලා තියෙනවා. ඒ කියන්නේ පැහැදිලිවම මේ අයට විදේශ රටවලින් මුදල් ආවා. ඒ නිසානේ අරගලයේ හිටපු සමහර අය සමාජ මාධ්යට ඇවිල්ල කියන්නේ අපි වාහන ගත්තා. අපි ගෙවල් ගත්තා. අපි රට ගියා. ඒ එක්කම තමන්ට වාහනය ගන්න, ගෙවල් ගන්න, රට යන්න බිල්ලට ලක්වෙච්ච දරුවෝ අද එල්ලුම් ගස් ගියා. අරගලයේම එක කොට්ඨාසයක් වාහන ගන්නයි, එක කොට්ඨාසයක් මැති ඇමතිවරු වෙන්නයි එක කොට්ඨායක් ගෙවල් ගන්නයි තවත් කොට්ඨාසයක් පිටරට ගිහින් පදිංචි වෙන්නයි තවත් 12ක් එල්ලුම් ගස් යන්නයි බෑනේ. ඒ කියන්නේ මේ කාරණය සම්බන්ධයෙන් මෙහෙයවපු අය රජවුණා අනිත් අය එල්ලුම් ගස් ගියා. මේක තමයි අවසානයේ සිද්ධ වුණේ.” යනුවෙන් ප්රකාශ කළේය.
