සිවනේසතුරෙයි චන්ද්‍රකාන්තන් හෙවත් පිල්ලෙයාන් පාස්කු ප්‍රහාරය සිදුවන අවස්ථාවේ දී ඒ පිළිබඳ පූර්ව දැනුවත්ව සිට ඇති බව මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල විශේෂ හෙළිදරව්වක් සිදුකළේය.
අද පාර්ලිමේන්තුව අමතමින් ඔහු වැඩිදුරටත් පැවසුවේ, මේ පිළිබඳව සාක්ෂි සහ තොරතුරු විමර්ශනවලදී අනාවරණය වී ඇති බවයි.
පාස්කු ප්‍රහාරය සිදුවන අවස්ථාවේ දී පිල්ලෙයාන් මඩකලපුව බන්ධනාගාරයේ සිටිමින් පාස්කු ප්‍රහාරය පිළිබඳ පූර්ව දැනුවත් භාවයකින් සිට ඇති බවයි අමාත්‍යවරයා වැඩිදුරටත් කරුණු පැහැදිලි කරමින් සඳහන් කළේ.
එමෙන්ම යුධ හමුදා බුද්ධි සමාජිකයින්ද පිල්ලෙයාන් සමග ඒ වන විට බන්ධනාගාර ගතව සිටි බවත් ඔවුන් පිල්ලෙයාන් සමගින් ඉතාම සමීපව කටයුතු කර ඇති බවටත් සාක්ෂි මගින් අනාවරණය වී ඇති බවත් අමාත්‍යවරයා මෙහිදී සඳහන් කළේය.
පාස්කු ප්‍රහාරය සම්බන්ධයෙන් අදහස් දක්වමින් අමාත්‍යවරයා මෙලෙස වැඩිදුරටත් පැවසීය.
”පාස්කු ඉරුදින ප්‍රහාරය සම්බන්ධ විමර්ශන ඉතා හොඳින් ඉදිරියට යමින් තියෙනවා. සභාවට ඉදිරිපත් කළ නොහැකි බරපතල සංවේදී කාරණා රාශියක් මේ වෙද්දී අනාවරණය වෙලා තියෙනවා.. මේ කරුණු පිළිබදව හොඳින් දන්නා සාක්ෂිකරුවෙකු ලෙස අසාද් මවුලානා හඳුනා ගෙන ඇති අතර ඔහු ලබා දී ඇති තොරතුරු ඔස්සේ විමර්ශන සිදු කරනවා.
ඒ වගේම ඔහුව ලංකාවට ගෙන්වා ගන්න ඕන කරන ක්‍රියාමාර්ග නීත්‍යානුකූලවත් රාජ්‍ය තාන්ත්‍රික මට්ටමිනුත් මේ වන විට ක්‍රියාත්මක කරලා තියෙනවා. බුද්ධි අංශයට සම්බන්ධ යම් කණ්ඩායම් කිසියම් දේශපාලන අරමුණක් සාක්ෂාත් කර ගැනීම සඳහා අන්තවාදී කණ්ඩායමකට සහාය දීමක් සිදු කර ඇත්තේද යන්න සොයා බලන්න අපාරාධ විමර්ශනයක් ඉතාම ගැඹුරින් සිදුවෙමින් පවතිනවා”
මහජනතාවට පොරොන්දු වූ පරිදිම පාස්කු ප්‍රහාර සම්බන්ධයෙන් නීතිය යුක්තිය ඉටු කිරීමට අපි කටයුතු කරනවා. ඒ වගේම අන්තවාදයටවත්, ජාතිවාදයටවත් අපි ඉඩ දෙන්නේ නෑ. අපි ඒක මුල ඉඳලාම කිව්වා. නීති මදිනම් අලුතින් නීති සකස් කරලා හරි අන්තවාදයත් ජාතිවාදයත් අපි අවසන් කරනවා”
