කොළඹ ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලන පවසන්නේ තවත් දින දෙකක් කොළඹ ජාතික රෝහලේ දැඩි සත්කාර ඒකකයේ හිටපු ජනපති රනිල් වික්‍රමසිංහ ප්‍රතිකාර ලැබිය යුතු බවට වෛද්‍යවරු නිර්දේශ කර ඇති බවයි.
ඔහුට බරපතළ ලෙස තිබුණේ විජලන තත්වයක් බවත් එය දැන් පහව යමින් තිබෙන බවත් වෛද්‍යවරයා පැවසීය. කෙසේ වෙතත් අනාවරණය වූ රෝග සම්බන්ධයෙන් ඉක්මන් ප්‍රතිකාරවලට යොමු නොවන්නේ නම් ඔහු අවදානමක සිටින බවද වෛද්‍ය බෙල්ලන කියා සිටියේ ය.
“ඔහුගේ හෘද වස්තුවේ කිරීටක ධමනියේ හතරෙන් තුනක් අවහිරයි කියලා ඊයේ වාර්තාවෙන් ප්‍රසිද්ධ වුණා. මම කිව්වේ ඔහුට වැඩිදුර ප්‍රතිකාර ගන්න වෙයි. ඉක්මනින් කරගන්න එක ඔහුට හොඳයි. දැන් ඇප ලැබිලා නිසා ඔහුට සම්පූර්ණ නිදහස තියෙනවා පුද්ගලික රෝහලක ප්‍රතිකාර ගන්න. විශේෂඥ වෛද්‍යවරුන් පවසන ආකාරයට ඔහුට තව දිනයක් දෙකක් ඉන්න වෙනවා. නමුත් ඔහුට තිබුණ උග්‍ර ප්‍රශ්නය වන විජලනය හා සම්බන්ධ තත්ත්වය දැන් ක්‍රමක් ක්‍රමයෙන් පහව යනවා. නමුත් හඳුනාගත් වෙනත් රෝගවලට ඉක්මනින් ප්‍රතිකාර ගන්න වෙයි. සුව අතට හැරෙන්නේ කොහොමද මෙච්චර බරපතළ තත්ත්වය ඉන්නකොට. ඉක්මනින් ප්‍රතිකාර කරේ නැත්නම් රිස්ක් එකක් තියෙනවා.”
