සැකසූ ආහාරවල මිල අසීමිත ලෙස ඉහළ යතැයි බිය පළ වේ!

කර්මාන්ත අමාත්‍යාංශයෙන් ඉල්ලා ඇති සහන ලබාදීමට රජයට නොහැකි වුවහොත්, සැකසූ ආහාරවල (Processed foods) සිල්ලර මිල ගණන් නුදුරේදීම පාරිභෝගිකයන්ට දරාගත නොහැකි මට්ටමකට පත්වනු ඇති බවත්, පාරිභෝගික වෙළෙඳපොළ සඳහා කිසිදු වට්ටමක් ලබාදීමට ඇති ඉඩකඩ අවම වනු ඇති බවත් ආහාර සැකසුම්කරුවන්ගේ සංගමය (FPA) ඊයේ (20) අනතුරු ඇඟවීය.

‘ද ඩේලි මෝනිං’ (The Daily Morning) පුවත්පතට ප්‍රකාශයක් ලබා දුන් එම සංගමයේ සභාපති අරුණ සේනානායක මහතා ප්‍රකාශ කළේ, ඉහළ යන විදුලි බිල්පත් සහ ඉන්ධන මිල ඉහළ දැමීම් මධ්‍යයේ, අමුද්‍රව්‍ය සහ ඇසුරුම් ද්‍රව්‍ය ඇතුළු ද්‍රව්‍යවල හිඟයකට මෙන්ම සැපයුම් දාමයන් බිඳවැටීමකට කර්මාන්තය මුහුණ දෙමින් සිටින බවයි. මෙම ගැටලුවලට විසඳුම් නොලැබුණහොත් ආහාර ද්‍රව්‍යවල සිල්ලර මිල දරාගත නොහැකි තරම් ඉහළ යනු ඇති බව ඔහු පැවසීය.

මෙම තත්ත්වයට මුහුණ දීම සඳහා සංගමය විසින් අමාත්‍යාංශය වෙත යෝජනාවලි ඉදිරිපත් කර ඇති බව ඔහු වැඩිදුරටත් සඳහන් කළේය. “අපි ඉල්ලා සිටියේ කර්මාන්තය සඳහා ඉන්ධන සහනයක්, කර්මාන්තයේ ධාරිතාව සැලකිල්ලට ගනිමින් විදුලි බිල්පත් සඳහා ගාස්තු අඩු කිරීමක් සහ අමුද්‍රව්‍ය සඳහා සහනයක්” යැයි ඔහු පැවසීය. කර්මාන්තය අමුද්‍රව්‍ය සම්බන්ධයෙන් බහුවිධ ගැටලුවලට මුහුණ දී සිටින බව ඔහු පෙන්වා දුන්නේය.

“ත්‍රිත්ව ස්තර ඇසුරුම් (three-layer packaging) සෑදීමට ගන්නා අමුද්‍රව්‍යයක් උදාහරණයකට ගන්න. මෙම එක් ස්තරයක් සඳහා ගන්නා අමුද්‍රව්‍යයක හිඟයක් ඇති වුවහොත්, එය එම අදාළ ආහාර ද්‍රව්‍යයේ සමස්ත ක්‍රියාවලියටම බලපානවා. එබැවින් මෙම කරුණ දෙස බලා මෙම තත්ත්වයට මුහුණ දීම සඳහා සහනයක් ලබාදෙන ලෙස අපි අමාත්‍යාංශයෙන් ඉල්ලා සිටියා,” ඔහු වැඩිදුරටත් පැවසීය. ඔහුට අනුව, නිෂ්පාදන පිරිවැය, ගබඩා කිරීමේ පිරිවැය, ඇසුරුම් මිල සහ අමුද්‍රව්‍ය පිරිවැය යන සියල්ල ඉහළ යමින් පවතින අතර, මෑතකදී සිදුකල ඉන්ධන සහ විදුලි මිල ඉහළ දැමීම් හේතුවෙන් ඒකකයක නිෂ්පාදන පිරිවැය (cost per unit) ඉහළ ගොස් ඇත.

මීට පෙරද මෙවැනි අවස්ථාවලදී අමාත්‍යාංශය කර්මාන්තයට සහය ලබා දී ඇති බව ඔහු පැවසීය. “උදාහරණයක් වශයෙන්, ඉන්ධන අර්බුදය මධ්‍යයේ, කිසිදු ගැටලුවකින් තොරව අපගේ කර්මාන්තයට ඉන්ධන ලබා ගැනීමට ඔවුන් අපට උදව් කළා. එබැවින් මෙම තත්ත්වය තුළදීත් ඔවුන් අපගේ ගැටලුවලට විසඳුම් ලබා දෙනු ඇතැයි අපි බලාපොරොත්තු වෙනවා.”

ඒකක 180කට වඩා පරිභෝජනය කරන කර්මාන්තශාලා සඳහා රජය දැනටමත් විදුලි ගාස්තු ඉහළ දැමීමක් පනවා ඇති අතර, ජනාධිපති අනුර කුමාර දිසානායක මහතා ද මෑතකදී අනතුරු ඇඟවූයේ නුදුරු අනාගතයේ දී ඉන්ධන මිල තවදුරටත් ඉහළ යා හැකි බවයි.