ගතවූ පැය 24 ඇතුළත කාලයේ දිවයිනේ විවිධ ප්‍රදේශවල සිදු වූ රිය අනතුරුවලින් 6 දෙනෙකු මිය ගොස් ඇති බව වාර්තා වේ.
මොරවැව, කිලිනොච්චි, අනුරාධපුර, වලස්මුල්ල සහ අරලගංවිල යන ප්‍රදේශවල මෙම අනතුරු සිදුව ඇති බවයි පැවසෙන්නේ.
ඒ 9 මාර්ගයේ ලොරි රථයක් සහ බස් රථයක් ගැටී ඇති අතර ඒ අවස්ථාවේ මාර්ගයේ ගමන් කරමින් තිබු යතුරු පැදියක් ලොරියේ ගැටීමෙන් පැදිකරු සහ පසුපැදිකරු මිය ගොස් ඇත. ඔවුන් වයස 25 සහ 27 යන වයස්වල පදිංචි අය බව පැවසේ.
ඒ අතර මොරවැවදී යතුරුපැදියක් පා පැදියක ගැටීම නිසා 71 හැවිරිදි පාපැදිකරු මියගොස් ඇත.
අනුරාධපුර මල්වතුඔය යකඩ පාලම අසලදී යතුරුපැදියක් පැදිකරුට පාලනය කර ගැනීමට නොහැකි වීමෙන් මාර්ගයෙන් ඉවතට පැන අසල පිහිටි ගසක ගැටිමෙන් සිදුවූ අනතුරකින් තරුණයෙකු මියගොස් ඇත. ගලෙන්බිඳුණුවැව පදිංචි 26 වියැති තරුණයෙකු මෙලෙස මරුදැක ඇත.
අරලගංවිල මනම්පිටිය මාර්ගයේ මැදගම ප්‍රදේශයේදී මාර්ගය හරහා ගමන් කළ පුද්ගලයෙකුගේ යතුරුපැදියක් ගැටී ඇති අතර 77 වියැති පදිකයා මරුමුවට පත්ව ඇත.
විශාල වශයෙන් සිදුවන මෙවැනි මාර්ග අනතුරු වළක්වා ගැනීමට පවත්නා මාර්ග නීති තදින් ක්‍රියාත්මක කිරීමට රජය තීරණය කර ඇති බව වාර්තා වේ.
