බලපත්රලාභී ස්පා හෙවත් සම්බාහන මධ්යස්ථාන වෙත පොලිසිය විසින් සිදු කරන බව කියන හිරිහැර සම්බන්ධයෙන් ශ්රී ලංකා ස්පා සංගමය විසින් පොලිස්පතිවරයා (IGP) සහ ශ්රී ලංකා මානව හිමිකම් කොමිෂන් සභාව (HRCSL) වෙත පැමිණිලි කර ඇත. මෑත කාලීනව සිදුවූ මෙම සිදුවීම් පිළිබඳව අපක්ෂපාතී පරීක්ෂණයක් පවත්වන ලෙසද එම සංගමය බලධාරීන්ගෙන් ඉල්ලා සිටී.
සම්බාහන මධ්යස්ථානවල සේවය කරන කාන්තා සේවිකාවන්ට සහ සමස්ත කර්මාන්තයට සිදුවන අසාධාරණයන් සම්බන්ධයෙන් පොලිස්පතිවරයාට පැමිණිලි කිරීමෙන් පසු, සිය සංගමයේ සාමාජිකයින්ට අයත් ව්යාපාරික ස්ථාන ඉලක්ක කර ගනිමින් විවිධ බලපෑම් එල්ල වෙමින් පවතින බවට ද සංගමය චෝදනා කරයි.
මේ සම්බන්ධයෙන් අදහස් දැක්වූ එම සංගමයේ නියෝජිතයෙකු ප්රකාශ කළේ, “අප සංගමයේ නිලධාරීන්ගේ ව්යාපාර විනාශ කිරීමේ කුමන්ත්රණයක් මේ වනවිට ක්රියාත්මක වෙමින් පවතිනවා. එක් මධ්යස්ථානයක් ගිනි තබා සම්පූර්ණයෙන්ම විනාශ කර තිබෙනවා. ඒ වගේම, වත්තල පිහිටි අපගේ වැඩබලන සභාපතිවරයාගේ ස්පා ආයතනයටත් ගිනි තබා තිබෙනවා. මේවා පැහැදිලිවම පලිගැනීමේ අරමුණින් කරන ලද ක්රියා බවට අපට දැඩි සැකයක් පවතිනවා,” යනුවෙනි. එසේම මෙම සිදුවීම් රජයට බලපෑමක් කිරීමේ අරමුණින් සිදුකරන්නේද යන්න පිළිබඳවද ඔහු ප්රශ්න කර සිටියේය.
සංචාරක අමාත්යාංශය විසින් නිකුත් කරන ලද වලංගු බලපත්ර යටතේ සහ සුදුසුකම් ලත් චිකිත්සකයින් (therapists) යොදාගනිමින් පවත්වාගෙන යනු ලබන මධ්යස්ථාන කිහිපයක් ද පොලිසියේ මෙම ක්රියාකලාපයන්ට ලක්ව ඇති බවත්, මේ හේතුවෙන් සිය ව්යාපාර කටයුතු පවත්වාගෙන යාම දැඩි අර්බුදයකට ලක්ව ඇති බවත් සංගමය පෙන්වා දෙයි.
“පොලිසිය තම බලතල නීතිවිරෝධී ලෙස භාවිතා කරමින්, බලපත්රලාභී ආයතනවලට පවා තම කටයුතු කරගෙන යාමට නොහැකි තත්ත්වයක් නිර්මාණය කර තිබෙනවා. අපට සංචාරක අමාත්යාංශයේ බලපත්ර තිබියදීත් සහ සහතික ලත් වෘත්තීය චිකිත්සකයින්ගේ සේවය ලබා ගනිමින් සිටියදීත් අපගේ ව්යාපාර කරගෙන යාමට නොහැකි නම්, අප කුමක් කළ යුතුද?” යනුවෙන් එම නියෝජිතයා වැඩිදුරටත් ප්රශ්න කළේය.
කෙසේ වෙතත්, නීතිවිරෝධී ලෙස පවත්වාගෙන යන ස්ථාන සඳහා තම සංගමය කිසිසේත් සහාය නොදක්වන බවත්, එහෙත් බලපත්රලාභී ආයතනවල කටයුතු කඩාකප්පල් නොකර ඒවා විධිමත්ව නියාමනය කරමින් ආරක්ෂා කිරීමට බලධාරීන් පියවර ගත යුතු බවත් ශ්රී ලංකා ස්පා සංගමය දැඩිව අවධාරණය කර සිටී.
