යේමනයේ ඒඩන් නගරයේ පිහිටා ඇති ජනාධිපති මන්දිරය ඉලක්ක කර ගනිමින් හූති කැරලිකරුවන් එල්ල කළ මිසයිල ප්‍රහාරයකින් පුද්ගලයින් පස් දෙනෙකු ජීවිතක්ෂයට පත්ව ඇති අතර තවත් පුද්ගලයින් 16 දෙනෙකු තුවාල ලබා ඇති බව විදෙස් වාර්තා පෙන්වාදෙයි.
ප්‍රහාරයේ ප්‍රධාන ඉලක්කය වී ඇත්තේ, යේමන රජයේ හමුදා සහ ඔවුන්ට සහාය දක්වන සෞදි ප්‍රමුඛ හමුදා සන්ධානය විසින් භාවිතා කරනු ලබන, අල්-මාෂික් මාලිගා පරිශ්‍රය තුළ පිහිටා ඇති හමුදා අණදෙන මධ්‍යස්ථානය බව කියවෙයි.
වසර ගණනාවක් පුරා පැවති සටන් විරාමය බිඳ වැටීමෙන් සහ හූතිවරුන් විසින් ප්‍රහාර මාලාවන් නැවත ආරම්භ කිරීමෙන් පසු උත්සන්න වී ඇති යේමන සිවිල් යුද්ධයේ තවත් බරපතළ හැරවුම් ලක්ෂයක් ලෙස මෙම සිදුවීම සැලකෙන අතර තුවාල ලැබූවන් අතර අගමැතිවරයාගේ ආරක්ෂක අංශ සාමාජිකයින් මෙන්ම සිවිල් සේවකයින් කිහිපදෙනෙකුද සිටින බව සඳහන්.
ප්‍රහාරය සිදුවන අවස්ථාවේ යේමන අගමැති අල්-සින්ඩානි මහතා මාලිගාව තුළ රැඳී සිට ඇතත් ඔහුට අනතුරක් සිදුව නැති බව දැක්වෙයි.
සිද්ධිය දැඩි ලෙස හෙළාදකිමින් අගමැතිවරයා සිය නිල ‘X’ ගිණුමේ සටහනක් තබා ඇති අතර, එහිදී ඔහු හූති ප්‍රහාරය ‘බියගුළු’ ක්‍රියාවක් ලෙස දක්වා ඇත.
හූති කැරලිකරුවන් අඛණ්ඩව සිවිල් වැසියන් සහ රාජ්‍ය ආයතන ඉලක්ක කරමින් ප්‍රහාර එල්ල කරන බවට ඔහු එහි චෝදනා එල්ලකර තිබේ.
2014 වසරේදී යේමනයේ අගනුවර වන සානා නගරය සිය පාලනයට නතු කරගත් හූති කැරලිකරුවන් මේ වනවිට එරට විශාල ප්‍රදේශයක බලය අත්පත් කර ගනිමින් වසර ගණනාවක සිට සන්නද්ධ ගැටුම්වල නිරතව සිටිති.
