හිටපු අමාත්ය විමල් වීරවංශ විසින් රචිත “නැත්ත වෙනුවට ඇත්ත” ග්රන්ථයේ ඇතුළත් ඇතැම් ලේඛන හරහා ජනතා විමුක්ති පෙරමුණේ ලේකම් ටිල්වින් සිල්වාගේ බුද්ධිමය දේපළ අයිතිය උල්ලංඝනය කර ඇති බවට තීන්දු කරමින්, ඔහුට රුපියල් මිලියනයක වන්දියක් ගෙවන ලෙස කොළඹ වාණිජ මහාධිකරණය නිකුත් කළ නියෝගයට එරෙහිව විමල් වීරවංශ මහතා ගොනු කළ අභියාචනය ශ්රේෂ්ඨාධිකරණය විසින් නිෂ්ප්රභ කර තිබේ.
කෙසේ වෙතත්, අදාළ ග්රන්ථය ප්රකාශයට පත් කිරීම, විකිණීම සහ බෙදාහැරීම වළක්වාලමින් වාණිජ මහාධිකරණය නිකුත් කර තිබූ තහනම් නියෝගය සංශෝධනය කිරීමට ශ්රේෂ්ඨාධිකරණය තීරණය කර ඇති අතර තහනම් නියෝගය ග්රන්ථයේ ඇතුළත් ටිල්වින් සිල්වා මහතාට අයත් ලේඛනවලට පමණක් සීමා කරන ලෙස ශ්රේෂ්ඨාධිකරණය නියෝග කළේය.
ශ්රේෂ්ඨාධිකරණ විනිසුරු ශිරාන් ගුණරත්න විසින් මෙම තීන්දුව ප්රකාශයට පත් කළ අතර, විනිසුරුවරුන් වන ජනක් ද සිල්වා සහ සම්පත් අබේකෝන් යන මහත්වරුන් එම තීන්දුවට එකඟත්වය පළ කළහ.
විමල් වීරවංශ සිය ග්රන්ථයට ජනතා විමුක්ති පෙරමුණට අයත් ලේඛන කිහිපයක් අවසරයකින් තොරව ඇතුළත් කිරීම මඟින් තම බුද්ධිමය දේපළ අයිතිය උල්ලංඝනය කර ඇති බවට ටිල්වින් සිල්වා වාණිජ මහාධිකරණය නඩුව ගොණු කර තිබුණි.
එම නඩුව විභාග කළ කොළඹ වාණිජ මහාධිකරණය, ටිල්වින් සිල්වා මහතාගේ බුද්ධිමය දේපළ අයිතිය උල්ලංඝනය වී ඇති බව තීරණය කරමින්, ඒ වෙනුවෙන් රුපියල් මිලියනයක වන්දියක් ගෙවන ලෙස විමල් වීරවංශ මහතාට නියෝග කරන ලදී. එම තීන්දුවට එරෙහිව ගොනු කළ විශේෂ අභියාචනය සලකා බැලූ ශ්රේෂ්ඨාධිකරණය, වන්දිය ගෙවන ලෙස වාණිජ මහාධිකරණය ලබා දී තිබූ නියෝගයට මැදිහත් නොවන බව ප්රකශ කා ඇත.
වාණිජ මහාධිකරණ විනිසුරුවරයා නීතිය හා කරුණු නිසි ලෙස සලකා බලා එම තීරණය ලබා දී ඇති බවයි ශ්රේෂ්ඨාධිකරණ විනිසුරු මඩුල්ල සිය තීන්දුවෙන් ප්රකාශයට පත්කර ඇත්තේ.
