මෙවර යල කන්නයේ වී මිලදී ගැනීම් අද (13) සිට ආරම්භ කිරීමට නියමිතයි.
ඒ අනුව මේ දිනවල උතුරු නැගෙනහිර සහ අම්පාර යන ප්රදේශ ආශ්රිතව වැඩිම වී අස්වනු නෙලීම සිදුවන හෙයින් එලෙස වැඩිම වී අස්වනු නෙලන ප්රදේශ ආශ්රිතව වී ගබඩා විවෘත කරමින් වී මිලදී ගැනීම් ආරම්භ කරන බවයි වී අලෙවි මණ්ඩලයේ සභාපති මංජුල පින්නලන්ද සඳහන් කළේය.
මෙවර වී අලෙවි මණ්ඩලය වී මිලදී ගනු ලබන මිල ගණන් පසුගියදා ප්රකාශයට පත් කෙරුණු අතර එහිදී නාඩු කිලෝ එකක් රුපියල් 120, සම්බා වී කිලෝවක් රුපියල් 130, කීරි සම්බා වී කිලෝවක් රුපියල් 140ක් යන මුදලට මිලදී ගැනීම සඳහා තීරණය වී ඇත.
වී අලෙවි මණ්ඩලය පැවසුවේ ස්ථාන 143ක ගබඩාවලින් වී මිලදී ගැනීම සඳහා මේ වන විට සැලසුම් සකස් කර ඇති බවයි.
මෙම මිලදී ගැනීම් සඳහා රජය විසින් වී අලෙවි මණ්ඩලය වෙත රුපියල් මිලියන 6,000ක මුදලක් ලබා දී ඇති අතර මීට අමතරව ඔඩපන ණය යටතේ තවත් රුපියල් මිලියන 10,000ක මුදලක් වෙන් කර තිබේ.
වී අලෙවි මණ්ඩලය පැවසුවේ මේ තුළින් කුඩා හා මධ්ය පරිමාණ වී මෝල් හිමියන්ට වී තොග රැස් කර ගැනීම සඳහා පහසුකම් සලසා දී ඇති බවත් මෙම කාර්ය ගොවිජන සංවර්ධන දෙපාර්තමේන්තුව විසින් අධීක්ෂණය කරන බවත්ය.
