දකුණු කොරියාවේ පැතිර යන ලැව්ගිනි ආශ්‍රිත ප්‍රදේශවලට යාමෙන් හැකිතාක් වළකින ලෙස එරට සිටින ලාංකිකයින්ගෙන් ශ්‍රී ලංකා තානාපති කාර්යාලය ඉල්ලීමක් කර තිබේ.
දැනට ලැව්ගිනි පැතිර යන කලාපවල රැඳී සිටින ශ්‍රී ලාංකිකයින් ඒ පිළිබඳ විමසිල්ලෙන් පසුවිය යුතු බවත් විවෘත ගිනිදැල් සහිත උපකරණ සහ ගිනි ගන්නා ද්‍රව්‍ය සහ දැවෙන සුළු ද්‍රව්‍ය භාවිත කිරීම අවම කරන ලෙසත් එම තානාපති කාර්යාලය දැනුම් දී තිබේ.
තව ද දකුණු කොරියාවේ දැනට පවතින ලැව්ගිනි හේතුවෙන් කිසිදු ශ්‍රී ලාංකිකයෙකුට අනතුරක් සිදුව නොමැති අතර ඕනෑම හදිසි අවස්ථාවකදී 2 735 2966, 2 735 2967 සහ 2 794 2968 යන දුරකථන අංක ඔස්සේ ලාංකිකයින්ට දැනුම්දිය හැකි බව ද තානාපති කාර්යාලය සඳහන් කළේය.
දකුණු කොරියාවේ ගිනිකොන දිග ප්‍රදේශයට බලපා ඇති ලැව්ගිනි හේතුවෙන් මේ වන විට පුද්ගලයින් 24 දෙනෙකු ද ජීවිතක්ෂයට පත්ව ඇති අතර 23,000කට අධික පිරිසක් නිවෙස්වලින් ඉවත් කිරීමට එරට බලධාරීන් පියවර ගෙන තිබේ.
